Azərbaycan, Bakı, 6 avqust /Trend, müxbir N.İsmayılova/
"Bank Melli İran"nın Bakı filialı avro ilə lokal plastik kartlar üzrə əməliyyatlar keçirməyə başlayıb. Bu barədə cümə günü filial direktorunun müavini Anar İbrahimov deyib.
"Bank əvvəllər plastik kartlar üzrə əməliyyatları manat və dollarla aparıb və bu aydan etibarən, artıq avro ilə əməliyyatların aparılmasına başlamışıq", - İbrahimov qeyd edib.
Onun sözlərinə görə, bank plastik kart emissiyalarının həcmini kəskin şəkildə artırmaq niyyətində deyil. Ötən ilin payızından etibarən 100 lokal kart buraxılıb.
Bank kartların emissiyasını üç mərhələdə genişləndirir. Birincisi - bank əməkdaşlarının kartla təmin olunması, ikincisi - İranın Azərbaycandakı dövlət nümayəndəlik və idarələrinin işçilərinin kartla təmini, üçüncüsü - kommersiya və bütün maraqlı şəxslərə kartların verilməsi.
"Bank Melli İran" artıq Azərbaycanda öz bankomat və POS-terminallarının quraşdırılmasına başlayıb. Bu günədək şəhərdə 4 bankomat quraşdırılıb.
Bankın "Bank Melli İran"ın filialı olması ilə əlaqədar, onun fəaliyyəti müəyyən dərəcədə məhdudur. Odur ki, "Bank Melli İran" öz müştərilərinə "MasterCard" və "Visa" beynəlxalq ödəniş sistemlərini dəstəkləyən plastik kartları verə bilmir (ABŞ hökumətinin İrana qarşı tətbiq etdiyi sanksiyalarla əlaqədar). Bankın məqsədi lokal kartlara xidmətin göstərilməsindən ibarətdir.
"Bank Melli İran" - İslam dünyasının filiallarının təkcə İranda deyil, həm də müxtəlif ölkələrdə olduğu ilk banklarından biridir. O, İranın bank aktivlərinin 30 faizinə sahibdir.
"Bank Melli İran"ın Bakı filialı 1993-cü ildən fəaliyyət göstərir. "Bank Melli İran" artıq 85 ildir fəaliyyət göstərir və onun əməkdaşlarının sayı 50 minə çatır.