Azərbaycan, Bakı, 28 avqust /Trend, müxbir A.Axundov/
Həyat sığortası ilə məşğul olan Azərbaycanın yeganə sığorta şirkəti "Atəşgah Həyat" istehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarının sığortası ilə məşğul olmaq niyyətindədir. Bu barədə Trend-ə şirkətin idarə heyətinin sədri Aytən Hüseynova bildirib.
Onun sözlərinə görə, şirkət Azərbaycan Maliyyə Nazirliyinin Dövlət Sığorta Nəzarəti Xidmətinə bu məhsul üzrə fəaliyyətin həyata keçirilməsi ilə bağlı müraciət edəcək.
"Məsələ ondadır ki, qanunvericiliyin tələbinə əsasən, sığorat şirkəti həyat sığortasının həyata keçirilməsi üzrə müddətsiz lisenziyaya, eləcə də müvafiq icraedici orqandan bu məhsul üzrə fəaliyyətin həyata keçirilməsi üzrə icazəyə malik olmalıdır. Müddətsiz lisenziya bizdə var, icazə ilə bağlı müraciət planlı rejimə göndəriləcək", - Hüseynova bildirib.
2009-cu ildə şirkətin 500 min manat, yığıb, 2010-cu ilin ilk yeddi ayında isə yığılan sığorta haqlarının həcmi 600 min manat təşkil edib. "Atəşgah Həyat" 2010-cu ilin sonunadək 1,4 milyon manat sığorta haqqı yığmağı planlaşdırır.
2009-cu ildə yeni qanunvericiliyə müvafiq olaraq "Atəşgah" şirkətlər qrupu həyat sığortası üzrə fəaliyyət göstərmək üçün ixtisaslaşdırılmış şirkət təsis edib. Beləliklə, "Atəşgah Həyat" sığorta şirkəti Azərbaycanda həyat sığortası ilə məşğul olan ilk və yeganə şirkətdir. Şirkətin səhmdarları I.S.R. Holding Ltd. və RAN-EXIM şirkətidir. "Atəşgah Həyat" sığorta şirkətinin nizamnamə kapitalı bu günə 2,3 milyon manat təşkil edir.
