Azərbaycan, Bakı, 29 noyabr /Trend, müxbir E.İsmayılov/
Gələn ilin sentyabrında Bakı Metropoliteni "Məşədi Əzizbəyov" stansiyasının yenidən qurulması üzrə işləri başa çatdırmağı planlaşdırır. Bu barədə bazar ertəsi Bakı Metropolitenindəki mənbə deyib.
"Hazırda bu istiqamətdə fəal işlər aparılır. Məsələn, əlavə çıxışın tikintisi üçün nəzərdə tutulan özül yerinin hazırlanmasına başlanılıb", - mənbə bildirib.
Onun sözlərinə görə, metrostansiyanın üçüncü çıxışı bu stansiyasının yaxınlığında yaradılan yeni yol qovşağının altında olacaq.
Stansiyanın yenidən qurulması üzrə işlər stansiya keçidlərində hərəkət edən horizontal üç yeni eskalatorun tikintisini nəzərdə tutur.
"Bu layihənin həyata keçirilməsi məqsədilə işlərin vaxtında başa çatması üçün işlər görülür", - mənbə vurğulayıb.
Bakı Metropoliteni 1967-ci ildən fəaliyyət göstərir. Yeddi stansiya - "İçərişəhər", "Sahil", "28 May", "Cəfər Cabbarlı", "Xətai", "Nizami", "Elmlər Akademiyası" dərin enişlidir, "Bakmil" yerüstü stansiyadır, qalanları isə sütunlu dayaz enişlidir (cəmi 22 stansiya var). Tunellərin ümumi uzunluğu 32,9 km-dir. Son illər metronun tikintisinə təxminən 600 milyon manat məbləğində ayrılan vəsaitlər hesabına "Nəsimi" və "Azadlıq prospekti" stansiyaları, "28 May" stansiyasının ikinci çıxışı istismara verilib.
