Bakı. Trend:
Suriyanın təhlükəsizlik orqanlarındakı mənbənin məlumatına görə, Suriya hakimiyyəti təxminən 250 mülki şəxsin qətlə yetirildiyi qətliamın əsas təşkilatçısının oktyabrın 15-də Livanda ələ keçirildiyini açıqlayıb.
Rəsmi SANA agentliyi bildirib: “Ümumi Kəşfiyyat İdarəsinin əməkdaşları 2013-cü ildə Baniasda törədilmiş qətliamın əsas şübhəlisi olan, Mihrac Ural adı ilə tanınan Əli Kayalını sərhədi keçərək qaçmağa cəhd göstərdiyi zaman saxlayıblar”. Agentlik hansı sərhəddən söhbət getdiyini dəqiqləşdirməyib. Əli Kayalı vətəndaş müharibəsi zamanı prezident Bəşər Əsədin qoşunlarının tərəfində döyüşən yarımhərbi qruplaşmanın üzvü olub.
Suriyanın təhlükəsizlik orqanlarındakı mənbə onun “Livan tərəfi ilə koordinasiya şəraitində keçirilən təhlükəsizlik əməliyyatı zamanı Livanda saxlanıldığını” bildirib.
2024-cü ilin sonlarında islamçı koalisiya tərəfindən devrilən Bəşər Əsədin hakimiyyətdən getməsindən və onun Livandakı müttəfiqi “Hizbullah”ın zəifləməsindən sonra Suriya və Livan ikitərəfli münasibətlərində yeni səhifə açmağa çalışırlar.
Human Rights Watch (HRW) təşkilatının məlumatına görə, 2013-cü il mayın 2-si və 3-də Tartus sahil vilayətinin əhalisinin əksəriyyəti sünnilərdən ibarət olan Bayda və Banias yaşayış məntəqələrində hökumət qüvvələri və hökumətyönlü silahlı birləşmələr tərəfindən azı 248 nəfər məhkəməsiz edam edilib.
HRW bu qətliamları Suriya vətəndaş müharibəsinin “ən çox insan tələfatına səbəb olan kütləvi edam epizodlarından biri” kimi qiymətləndirib. Suriya İnsan Hüquqları üzrə Müşahidə Mərkəzinin (OSDH) məlumatına görə, Banias və Bayda qətliamlarında ölənlərin ümumi sayı təxminən 400 nəfərdir.
Türkiyənin rəsmi Anadolu agentliyinin məlumatına görə, 1956-cı ildə Antakyada anadan olan Mihrac Ural Türkiyədə həbsdə olub, 1982-ci ildə isə ölkədən qaçaraq Suriyada məskunlaşıb. Əsəd ailəsinə yaxın şəxslərdən biri ilə evlənən Ural keçmiş prezident Hafiz Əsədin (1930–2000) qardaşı Cəmil Əsədlə sıx əlaqələr qurub və böyük sərvət əldə edib.
Türkiyə agentliyinin məlumatına görə, vətəndaş müharibəsi zamanı Ural Suriyadakı rejimlə müttəfiq olan və Tartusun şimalında, Latakiya vilayətinin bəzi ərazilərinə nəzarət edən yarımhərbi qruplaşmaya rəhbərlik edib. Həmin qruplaşma Banias və Bayda qətliamlarında iştirak edib.
