Azərbaycan, Bakı, 15 dekabr /Trend, müxbir H.Vəliyev/
Yanvar-noyabr ayları ərzində Azərbaycanın metallurgiya sənayesi və hazır metallar istehsalı müəssisələri tərəfindən 149,7 milyon manat məbləğində məhsul istehsal edilib və xidmət göstərilib. Bu barədə Dövlət Statistika Komitəsinin məlumatında deyilir.
Bu dövrdə metallurgiya sənayesində istehsalın həcmi 22,3 faiz artıb, hazır metal məhsullarının istehsal həcmi isə 6 faiz azalıb.
Ötən dövr ərzində 109,4 min ton tökmə polad istehsal edilib ki, bu da ötən ilin müvafiq dövr göstəricisindən 2,2 dəfə çoxdur. Polad boru 30,6 min ton həcmində istehsal edilib ki, bu da ötən ilin müvafiq dövr göstəricisindən 5,1 dəfə çoxdur. Armatur istehsalının həcmi 105,4 min ton təşkil edərək 4,9 faiz azalıb. Tökmə çuqun istehsalı 42,9 faiz təşkil edib və həcmi 884,7 ton olub.
Qara metallardan hazırlanan naqil və kanatların istehsal həcmi 1021 ton təşkil edib ki, bu da ötən ilin 11 ayında qeydə alınan göstəricidən 3,5 dəfə çoxdur.
Qara metallardan hazırlanan yarımfabrikatların ixrac həcmi doqquz ayın yekunlarına əsasən, 81,8 min tonu ötüb (38,1 milyon dollar məbləğində) ki, bu da ötən ilin müvafiq dövr göstəricisindən 5,9 dəfə çoxdur (pula çevirdikdə təxminən 7,1 dəfə).
Qara metallardan hazırlanan günyə və şvellerlərin həcmi 10 ay ərzində 48,7 min ton olub ki (22,2 milyon dollardan çox məbləğdə), bu da 2009-cu ilin müvafiq dövr göstəricisindən 98,5 faiz (məbləğdə 92,5 faiz çox) çoxdur.
Yanvar-oktyabrda qara metallardan hazırlanan boruların ixracı 31,6 min tondan çox olub ki (24,8 milyon dollardan yuxarı məbləğdə), bu da ötən ilin müvafiq dövr göstəricisindən 7,1 dəfədən çoxdur.
Dekabrın 15-nə rəsmi məzənnə 0,7987 AZN/USD təşkil edir.