...

Azərbaycan Mərkəzi Bankı bankların kapital elementlərinin keyfiyyətinə diqqəti artıracaq

Biznes və iqtisadiyyat xəbərləri Materials 10 Fevral 2011 18:03 (UTC +04:00)

Trend-i buradan izləyin

Azərbaycan, Bakı, 10 fevral / Trend, müxbir İ.Xəlilova /

Azərbaycan Mərkəzi Bankı (AMB) bu gün 10 milyon manat səviyyəsində müəyyən edilən bank kapitalına olan tələblərin artırılması məsələsinə baxmır. Bu barədə cümə axşamı Trend-ə AMB-nın kredit təşkilatlarının fəaliyyətinə nəzarət üzrə departamentinin direktoru Rəşad Orucov bildirib.

"Bu həddi kifayət qədər yüksək səviyyə hesab etmək olar. Misal üçün, Rusiyada minimum tələbin 3 milyon avrodan 5 milyon avroyadək artırılması ilə bağlı yenicə qərar qəbul edilib, - Orucov bildirib. - Digər tərəfdən, biz hələ minimum tələbin 10 milyon manatdan 20-30 milyon manatadək artırılmasına elə də böyük ehtiyac görmürük və bu məsələ ilə bağlı heç bir qərar yoxdur".

Yeri gəlmişkən, Mərkəzi bank çərçivə sazişi imzaladığı müxtəlif banklarla kapitallaşma ilə bağlı ayrı-ayrı proqramlara malikdir ki, banklar onun əsasında kapitallaşma prosesini həyata keçirirlər. Orucovun sözlərinə görə, bu banklardan hər biri üçün ayrı-ayrılıqda vəziyyətdən asılı olaraq minimum tələblər müəyyən edilib və bütün sektor üçün vahid standart yoxdur.

"Hazırda kapital elementlərini keyfiyyətinin yaxşılaşdırılması məsələsi nisbətən daha çox aktuallıq kəsb edir, yəni, bu gün dünya maliyyə cəmiyyətlərində müzakirə mövzusu olan bankların kapitalları hansı element və vəsaitlər hesabına artırıla bilər, - Orucov qeyd edib. - Bütün dünyanın kapitalın tərkibinə daxil etdiyi hibrid elementlər qeyri-sabitdir və uzunmüddətli deyil. Bizdə isə bu vəziyyət kökündən fərqlənir".

Onun sözlərinə görə, Azərbaycan banklarının kapital bazasında kapitala daxil edilən hibrid elementlə nadir hallarda rastlaşmaq olar. Azərbaycan banklarında kapital səhmdar kapitalın və qazanılan kapitalın (əvvəlki ilin mənfəəti) hesabına formalaşır. Bəzi bankların kapitallarının tərkibində subordinasiya kreditlərini də görmək mümkündür.

"Lakin biz qaydalarımıza bir daha yenidən baxmağa, məhz sabit kapital elementi olan səhmdar kapitala xüsusi diqqət yetirməyə hazırlaşırıq. Gələcəkdə qeyri-stabil elementlər hesabına kapital artımına yol verməmək üçün hibrid elementlər üzrə tələblərimizə yenidən baxacağıq. Bununla yanaşı biz bu sahədə olan yenilikləri öyrənmək fikrindədir", - Orucov bildirib.

Mərkəzi bank tərəfindən təyin edilən kapitalın adekvatlıq norması 12 faiz səviyyəsindədir ki, bu da kifayət qədər yüksək hesab edilir. Çünki Bazel komiktəsinin normativ tələbləri 8 faiz səviyyəsindədir.

"Lakin bu göstərici üzrə biz nizamlayıcı çərçivəyə yenidən baxmaq fikrindəyik və hər bir bankla fərdi işləyəcəyik", - Orucov bildirib.

Fevralın 10-na olan rəsmi məzənnə 0,7961 AZN/USD təşkil edir.

Xəbər lenti

Xəbər lenti