Azərbaycan, Bakı, 15 fevral /Trend, müxbir İ.Xəlilova/
2011-ci ilin yanvarında Azərbaycanın əsas kapitalına qoyulan xarici investisiyaların ümumi həcmi 161,8 milyon manat təşkil edib. Bu, ötən ilin analoji dövrü ilə müqayisədə 30 faiz azdır. Bu barədə Dövlət Statistika Komitəsindən bildiriblər.
Ötən ay Azərbaycan iqtisadiyyatına xarici ölkə və beynəlxalq təşkilatlar tərəfindən yatırılan investisiyaların 75,3 faizi (121,9 milyon manat) Böyük Britaniya, ABŞ, Yaponiya, Norveç, Türkiyə və Koreya investorlarının payına düşür.
Əvvəllər olduğu kimi Böyük Britaniya Azərbaycana yatırılan investisiyaların həcminə görə liderliyini qoruyub. Onun xarici sərmayələrin həcmində xüsusi çəkisi 41,3 faiz təşkil edib. Britaniya investisyaları 66,8 milyon manat olub.
ABŞ investisyaları 25,52 milyon manat (xüsusi çəkidə 15,8 faiz), Yaponiya - 12,28 milyon manat (7,6 faiz), Norveç - 6,9 milyon manat (4,3 faiz), Türkiyə - 5,5 milyon manat (3,4 faiz), Koreya - 4,8 milyon manat (2,9 faiz), İsveçrə - 425,4 min manat təşkil edib.
Beynəlxalq maliyyə institutlarından ən böyük investisiya həcmi Dünya Bankı tərəfindən (18,2 faiz xüsusi çəki ilə 29,5 milyon manat) yatırılıb.
Asiya İnkişaf Bankı Azərbaycanda layihələrin həyata keçirilməsinə 9,35 milyon manat (5,8 faiz), İslam İnkişaf Bankı isə 700,6 milyon manat (0,4 faiz) yönəldib.
Fevralın 15-nə olan rəsmi məzənnə 0,7954 AZN/USD təşkil edir.
