Azərbaycan, Bakı, 22 fevral /Trend, müxbir Ü.İsmayılova/
Azərbaycanın Əmlak Məsələləri Dövlət Komitəsi yanvarda Gəncə və Şəki şəhərlərində "Kadastr və daşınmaz əmlakın qeydiyyatı" layihəsini həyata keçirməyə başlayıb. Bu barədə çərşənbə axşamı komitənin yaydığı məlumatda deyilir.
"Layihənin əsas məqsədi Gəncə və Şəki şəhərlərində kadastr və daşınmaz əmlakın qeydiyyatı sisteminin inkişafı, daşınmaz əmlakın qeydiyyatı sahəsində xidmət səviyyəsinin artılılması, eləcə də bu sahədə operativliyin artırılmasıdır", - məlumatda qeyd olunur.
Layihənin təqdimatı bu şəhərlərdə Almaniyanın KfW inkişaf bankının GFA/GCI Consortium şirkətlərindən cəlb etdiyi məsləhətçilər tərəfindən keçirilib.
"Kadastr və daşınmaz əmlakın qeydiyyatı" layihəsi Azərbaycan və Almaniya hökumətləri arasında maliyyə əməkdaşlığı haqqında saziş çərçivəsində həyata keçirilir.
Layihə iki mərhələdə həyata keçiriləcək. Birinci mərhələ məsləhətçi xidmətlərin göstərilməsindən ibarətdir və layihənin bu komponenti üzrə tenderin qalibi GFA/GCI Consortium şirkəti olub. Şirkət artıq iş planını Dövlət Komitəsinə təqdim edib və yanvarda fəaliyyətə başlayıb.
Layihə 30 ay ərzində reallaşdırılacaq. Layihənin həyata keçirilməsi nəticəsində daşınmaz əmlakın qeydiyyat prosedurları təkmilləşdiriləcək, vaxta qənaət təmin olunacaq, eləcə də daşınmaz əmlakın qeydiyyatına xərclər azaldılacaq. "Bu regionlarda göstərilən xidmətlərin keyfiyyətinin yüksəlməsi və operativliyinin artırılmasına nail olunacaq", - komitənin məlumatında deyilir.
Layihənin həyata keçirilməsi torpaq sahələrinin və daşınmaz əmlakın idarə edilməsi üçün əlverişli mexanizmin formalaşması üçün şərait də yaradacaq.
KfW layihənin həyata keçirilməsinə 2,5 milyon avro məbləğində güzəştli kredit və benefisiar-təşkilatın təsisinin təşkili üçün bir milyon avro qrant ayırıb.
