Azərbaycan, Bakı, 3 mart /Trend, müxbir Ü.İsmayılova/
2011-ci ilin elan edildiyi "Turizm ili" çərçivəsində Azərbaycanda üç regional paytaxt yaradılacaq. Bu barədə cümə axşamı Azərbaycan investorlarının Bakıda keçirilən "The Azerbaijan Investors' Summit 2011" sammitində Azərbaycan Turizm İnstitutunun rektoru Cəfər Cəfərov deyib. O, bunun məhz hansı regionlar olacağını dəqiq deməyib.
"Azərbaycanda "Turizm ili" çərçivəsində yeni məhsullar da hazırlanacaq. Ümumilikdə ölkənin turizm sənayesinin yaxşılaşdırılması üçün çoxlu plan var", - Cəfərov bildirib.
Onun sözlərinə görə, hazırda Azərbaycanda dəyəri 2-3 milyon avro qiymətləndirilən "Şahdağ" yay-qış turizm kompleksinin tikintisi davam edir. İlin sonuna tikintinin birinci mərhələsinin başa çatdırılması planlaşdırılır. Obyekt 2016-cı ildə tam istismara veriləcək. Tikintinin birinci mərhələsi dövlət hesabına maliyyələşdirilib, qalan mərhələlərin həyata keçirilməsi üçün xarici investisiyalar cəlb ediləcək.
"Bu, xarici investorlar üçün yaxşı və sərfəli imkandır. Belə ki, obyekt hər gün 10 min turistə xidmət göstərəcək", - Cəfərov vurğulayıb.
Turizm İnstitutunun rektoru onu da deyib ki, bu, Azərbaycana turist axınının artmasına xidmət edəcək yeganə böyük turizm obyekti deyil. Ölkədə iri "Böyük Zirə" (Zirə adasında) və s. turizm obyekti də tikilir.
"Hazırda Azərbaycanda turizm sektoru kifayət qədər inkişaf etməyib, lakin bu sahənin ciddi potensialı var. Hazırda ölkə iqtisadiyyatının artımına təsir göstərən əsas amil neft faktoru olsa da, Azərbaycan hökuməti turizm sektorunu xarici investisiyaların cəlb edilməsi üçün qeyri-neft sektorunun ən vacib istiqamətlərindən biri kimi qiymətləndirir", - Cəfərov əlavə edib.
Martın 2-3-də Bakıda keçirilən sammitdə 130-a yaxın Azərbaycan şirkəti və 50 xarici investor iştirak edir.
"The Azerbaijan Investors' Summit 2011"in keçirilməsinin informasiya tərəfdaşı qismində Trend BİA da çıxış edib.