Azərbaycan, Bakı, 2 may /Trend, müxbir N.İsmayılova/
Aprelin 1-nə ölkədə 4342 ədəd ödəniş kartı olub ki, bu da martın əvvəlinə olan göstəricini 1,4 faiz, 2009-cu ilin müvafiq dövrünün göstəricini isə 7 faiz ötür. Bu barədə bazar ertəsi Azərbaycan Mərkəzi Bankının məlumatında deyilir.
Hesabat dövründə debet kartları üzrə əməliyyatların sayı 4727 min ədəd (mart üzrə artım 22,6 faiz), ümumi məbləği 605 milyon manat (32,7 faiz) təşkil edib.
Debet kartları üzrə əməliyyatların ümumi sayından bankomatlar vasitəsilə 572 milyon manat məbləğində 4530 min əməliyyat, POS-terminallar vasitəsilə 20 milyon manat məbləğində 105 min əməliyyat həyata keçirilib.
Martda kredit kartları üzrə 66 milyon manat (22,2 faiz) məbləğində 246 min əməliyyat (23 faiz) həyata keçirilib.
Kredit kartları üzrə əməliyyatların ümumi sayından bankomatlar vasitəsilə 23 milyon manat məbləğində 92 min əməliyyat, POS-terminallar vasitəsilə 14 milyon manat məbləğində 26 min əməliyyat həyata keçirilib.
Bankomatlar və POS-terminallar vasitəsilə ödəniş kartları ilə ümumi dövriyyə aprelin 1-nə 4,973 milyon manat təşkil edib ki, burada debet kartları vasitəsilə əməliyyatların payı 95 faiz olub.
Aprelin 1-nə olan məlumata görə, ölkədə 1929 bankomat fəaliyyət göstərir ki, burada illik artım 214 ədəd təşkil edir. Bankomatlardan 1071 -i Bakıda, 848-i isə ölkənin digər şəhər və rayonlarında yerləşir.
Hesabat dövründə POS-terminalların sayı 8857 ədəd təşkil edib. Onlardan 8027-si Bakıda, 830 ədədi isə digər şəhər və rayonlarda yerləşir.
Mayın 2-nə olan rəsmi məzənnə 0,7916 AZN/USD təşkil edir.
