Azərbaycan, Bakı, 3 may /Trend, müxbir N.İsmayılova/
2011-ci ilin mart ayında Azərbaycan banklarının depozit bazası 6,2 faiz, ilin əvvəlindən isə 1,5 faiz artıb. Bu barədə Azərbaycan Mərkəzi Bankının (AMB) məlumatında deyilir.
AMB-nin məlumatına görə, martın sonuna bank depozitlərinin, hüquqi və fiziki şəxslərin əmanətlərinin ümumi həcmi fevralın sonuna olan 5209,8 milyon manata nisbətdə 5532,3 milyon manat təşkil edib. İlin əvvəlində isə bu göstərici 5448,8 milyon manat olub. Ümumi həcmin 2541,5 milyon manatı manat vəsaitinin payına, 2990,8 milyon manatı isə valyutanın payına düşüb.
Mart ayı ərzində fiziki şəxslərin əmanətləri 4,7 faiz, hüquqi şəxslərin depozitlərinin həcmi isə 8,5 faiz artıb. İlin əvvəli ilə müqayisədə fərdi müştərilərin depozitləri 8,6 faiz artıb, korporativ müştərilərin depozitləri isə 7,3 faiz azalıb.
Hesabat dövrü ərzində fiziki şəxslərin ölkənin banklarındakı əmanətlərinin həcmi 3289,1 milyon manat təşkil edib. Bu göstərici fevralın sonunda 3142,9 milyon manat, 2011-cu il yanvarın 1-nə isə 3029,8 milyon manat olub.
Martın sonuna hüquqi şəxslərin depozitlərinin həcmi 2243,2 milyon manat təşkil edib. Bu göstərici fevralın sonuna 2066,9 milyon manat, yanvarın 1-nə isə 2419 milyon manat təşkil edib.
Mayın 3-nə olan rəsmi məzənnə 0,7913 AZN/USD təşkil edir.
