Azərbaycan, Bakı, 17 may /Trend, müxbir A.Axundov/
2012-ci ildə Azərbaycanda "Eurovision" müsabiqəsinin keçirilməsi mənzil icarəsinin qiymətlərinin qısamüddətli artmasına səbəb olacaq. Bu barədə Trend-ə çərşənbə axşamı "MBA Group" konsaltinq şirkətinin baş direktoru Nüsrət İbrahimov deyib.
"Uzaq xaricdən olan qonaqlar əsasən mehmanxanalarda qalacaqlar, mənzil və fərdi evləri isə əsasən ölkə regionlarından və ya qonşu ölkələrdən gələn şəxslər kirayə edəcəklər", - İbrahimov qeyd edib.
Onun sözlərinə görə, icarə qiymətləri 1-2 ay ərzində yüksək olacaq, lakin sonradan hər şey adi qaydaya düşəcək.
2011-ci ilin aprelində Azərbaycan paytaxtında mənzil icarəsi 2 faiz bahalaşaraq bir mənzil üçün 676 dollar olub. İlin əvvəlinə nisbətdə mənzil icarəsi 0,1 faiz bahalaşıb, ötən ilin analoji dövrü ilə müqayisədə isə 2 faiz azalıb.
