Azərbaycan, Bakı, 21 iyun /Trend, müxbir N.İsmayılova/
Azərbaycan bankı "Turan Bank" mikrokreditləşdirmənin inkişafına dair maliyyələşdirmənin cəlb olunması məsələsi üzrə beynəlxalq maliyyə qurumları ilə danışıqlar aparır. Bu barədə çərşənbə axşamı Trend-ə bankın Müşahidə Şurasının sədri Fuad Musayev bildirib.
"İndi sərmayədarlarla fəal danışıqlar aparılır və ilin sonunadək bir və ya iki kredit xəttinin cəlb olunacağı gözlənilir", - Musayev deyib.
İlin sonunadək bank öz kredit portfelini cari 110 milyon manatdan 120 milyon manatadək çatdırmağı planlaşdırır. Bu il bank eləcə də əvvəllər verilən kreditlərin ödənilməsindən əldə olunan vəsaitlər hesabına 50 milyon manata yaxın kredit verməyi planlaşdırır.
Bankın beynəlxalq əlaqələr şöbəsinin rəhbəri İlqar Məhərrəmovun sözlərinə görə, bu gün mikro, kiçik və orta kreditləşdirmə bankın ümumi kredit portfelinin 42 faizini təşkil edir, yerdə qalan 58 faiz istehlak və kommersiya kreditləşdirməsinin payına düşür. Bankın planlarına mikro, kiçik və orta sahibkarlığın kreditləşdirilməsinin 70 faizədək çatdırılması daxildir. Verilən kreditlərin ümumi həcmindən 57,7 faiz Abşeron rayonu ərazisində paylanılıb, ona görə də bankın məqsədi regionlarda fəaliyyətin genişləndirilməsidir.
"Bu gün bankın 11 filialından səkkizi ölkənin regionlarında fəaliyyət göstərir və ilin sonunadək daha iki - iki aydan sonra Xaçmazda, ilin sonuna Lənkəranda və ya Masallıda bir filialın açılması planlaşdırılır", - Məhərrəmov bildirib.
Mayın sonuna olan məlumata görə, bankın aktivləri 141 milyon manat, kredit portfeli 111 milyon manat, depozit portfeli isə 50,7 milyon manat təşkil edir. Bu gün bank 20 755 aktiv müştəriyə malikdir. Bankın nizamnamə kapitalı 22 milyon manat təşkil edir.
Musayevin sözlərinə görə, "Turan Bank" habelə səhmdarlığa strateji tərəfdaşların cəlb olunması planlarına malikdir ki, bununla əlaqədar "Moody's", "Fitch" və Standart& Poor's" kimi beynəlxaql reytinq agentlikləri ilə məsləhətləşmələr keçirilir və onlar öz təkliflərini təqdim edirlər.
Hazırda "Turan Bank" 25 səhmdara malikdir, onlardan beşi hüquqi şəxs (21,8 faiz), 20-si isə fiziki şəxsdir (78,2 faiz).
İyunun 21-nə olan rəsmi məzənnə 0,7873 AZN/USD təşkil edir.
