Azərbaycan, Bakı, 27 iyul /Trend, müxbir N.İsmayılova/
Azərbaycan Vergilər Nazirliyi Niderland Krallığının Vergilər Administrasiyası ilə birlikdə beynəlxalq tvinninq proqramı çərçivəsində həyata keçirilən elektron audit sisteminin tətbiqi layihəsinin ikinci komponentinin həyata keçirilməsinə başlayıb. Trend-in məlumatına görə, bu barədə çərşənbə günü nazirliyin "Vergilər" qəzetinə müsahibəsində layihənin rəhbəri Asəf Əsədov deyib.
2013-cü ilədək nəzərdə tutulan layihə altı komponentdən ibarətdir. İkinci komponent elektron auditin aparılması üçün proqram təminatının seçilməsini nəzərdə tutur. Bu məqsədlə Azərbaycanın nümayəndə heyəti Avstiya və Niderlandda olub. Orada bu ölkələrin vergi administrasiyalarının ekspertləri onlar üçün ACL proqram təminatının təqdimatını keçiriblər.
Proqram təminatının öyrənilməsinin sadələşdirilməsi məqsədilə vergi auditorları tərəfindən yeni proqram təminatı - ACL-Mentor hazırlanıb. Bundan başqa, Almaniyanın DATEV şirkəti ilə istifadəsi sadə və elektron auditin məqsədlərinə uyğun olan yeni interfeys yaradılıb.
"Elektron audit vergiödəyicilərin hüquqlarının qorunmasına yönəlib. Onun tətbiqi üçün avtomatlaşdırılmış informasiya sistemi lazımdır və hazırda Vergilər Nazirliyinin malik olduğu sistem elektron auditin aparılması üçün bütün imkanlara malikdir", - nazirlikdə hesab edirlər.
Tvinninq layihə iki il üçün nəzərdə tutulub. Artıq bütün mərhələlər üzrə tədbirlər planı hazırlanıb. Onlardan birincisi kadrların hazırlanmasıdır. Elektron audit sisteminin tətbiqi səyyar yoxlamaların sayını 90 faiz azaltmağa imkan verəcək.
