Azərbaycan, Bakı, 23 sentyabr /Trend, müxbir N.İsmayılova/
"AzMeCo" şirkəti Azərbaycanda metanol istehsalının inkişafı üzrə layihənin ikinci mərhələsinin həyata keçirilməsi planlarına yenidən baxır. Bu barədə Trend-ə cümə günü şirkətin idarə heyətinin sədri Nizami Piriyev məlumat verib.
"Əvvəllər metanoldan sonra ammonium və karbamid istehsalına başlamaq planlaşdırılırdı. Lakin ARDNŞ (Azərbaycan Respublikası Dövlət Neft Şirkəti) azot gübrələri istehsalı zavodunun tikintisi ilə bağlı planlarını açıqladıqdan sonra biz sirkə turşusunun, ola bilsin ki, olefinlərin istehsalı barədə ətraflı fikirləşəcəyik", - Piriyev deyib.
Onun sözlərinə görə, hazırda layihənin ikinci mərhələsinin texniki-iqtisadi əsaslandırılmasına hazırlıq aparılır. Şirkət istehsal üçün sərfəli olan məhsulların çeşidinin müəyyən edilməsi məqsədilə bazarı öyrənir.
"Layihənin maliyyələşdirilməsinin öz vəsaitlərimiz hesabına həyata keçirildiyini nəzərə alsaq, biz bazarda hansı məhsula daha çox tələb olduğunu öyrənirik. Bununla yanaşı, layihənin həyata keçirilməsinin növbəti mərhələsində iştirak edəcək banklarla danışıqlar aparırıq", - o deyib.
Piriyevin sözlərinə görə, ilin sonunadək şirkət zavodda istehsal olunacaq məhsulu müəyyən etmək niyyətindədir.
"ARDNŞ-nin tikəcəyi zavodda karbamidin istehsal olunacağını nəzərə alaraq, biz yeni karbamid və metanol məhsullarının əldə olunması üçün xammal kimi istifadə olunacaq zavod tikəcəyik", - o deyib.
"AzMeCo" 2007-ci ildə yaradılıb. Şirkət öz portfelinə Xəzər hövzəsindəki beynəlxalq karbohidrogen layihələrinin əlavə edilməsi ilə Azərbaycanın qeyri-neft sektoruna investisiya qoyuluşunun baş planını hazırlayıb.
Metanol zavodu Cənubi Qafqazda və Orta Asiyada yeganə zavod olacaq. O, 2012-ci ildə istismara veriləcək.
