Azərbaycan, Bakı, 8 dekabr /Trend, müxbir N.İsmayılova/
Azərbaycan Mərkəzi Bankı (AMB) 2012-ci ildə öz sərəncamında olan valyuta ehtiyatlarının 3 milyard dollar artacağını gözləyir. Trend-in məıumatına görə, bu barədə cümə axşamı jurnalistlərə Mərkəzi Bankın idarə heyəti sədrinin müavini Aftandil Babayev bildirib.
"2011-ci ilin sonunadək valyuta ehtiyatlarının 9 milyard dollar səviyyəsində olacağı gözlənilir", - Babayev deyib.
2011-ci il noyabrın 1-nə olan vəziyyətə görə, Mərkəzi Bankın valyuta ehtiyatları 7 074,3 milyon dollar təşkil edib.
İlin sonunadək valyuta ehtiyatlarının 9 milyard dollaradək artması AMB-nin ölkənin valyuta bazarında iştirakı sayəsində gözlənilir.
"Bu gün Mərkəzi Bankın valyuta intervensiyalarının həcmi 620 milyon dolları ötür. Əlavə olaraq, ilin sonunadək valyuta bazarına 1,5 milyar dollar həcmində vəsaitin daxil olması gözlənilir. Belə ki, adətən dekabrda valyutaya təklif artır", - sədr müavini bildirib.
Azərbaycan Mərkəzi Bankı manatın məzənnəsinin həm ucuzlaşma, həm də bahalaşma tərəfə həddindən artıq dəyişməsindən qaçmaq məqsədilə milli valyutanın məzənnəsinə nəzarət edir. Məzənnənin sabit səviyyədə saxlanması ölkənin valyuta bazarına əlavə daxilolmalar vasitəsilə baş verir və ötən il intervensiya həcmləri bir milyard dolları ötüb. AMB-nin valyuta bazarına müdaxiləsi valyuta ehtiyatlarının həcminin dəyşməsinə gətirib çıxarır.
Oktyabrda Mərkəzi Bankın valyuta ehtiyatlarının həcmi 1,9 faiz, ilin əvvəlindən 10,4 faiz, illik hesablamada isə 15,4 faiz olub.
Oktyabrın 1-nə Mərkəzi Bankın valyuta ehtiyatları 6 943,3 milyon dollar, sentyabrın 1-nə 7 114,2 milyon dollar, avqustun 1-nə 7 073,8 milyon dollar, iyulun 1-nə 6 947,5 milyon dollar, iyunun 1-nə 6 898,8 milyon dollar, aprelin 1-nə 6 718,4 milyon dollar, martın 1-nə 6 705,2 milyon dollar, fevralın 1-nə - 6 566,9 milyon dollar, 2011-ci il yanvarın 1-nə 6 407,6 milyon dollar, 2010-cu il noyabrın 1-nə isə 6 127,9 milyon dollar olub.
2010-cu ildə AMB-nin valyuta ehtiyatları 1 245,7 milyon dollar və ya 24,1 faiz artıb.
