Azərbaycan, Bakı, 9 fevral /Trend müxbir A. Axundov/
Adambaşına düşən investisiyaların həcminə görə Azərbaycan Dünya Bankının (DB) tərəfdaş ölkələri arasında liderdir. Trend-in məlumatına görə, bu barədə cümə axşamı Bakıda keçirilən "Azərbaycanın vergi sistemi: reallıqlar və perspektivlər" forumunnda çıxış edən DB-nin Bakı nümayəndəliyinin rəhbəri Cozef Ouen bildirib.
"DB-nin Azərbaycandakı mövcud portfeli kifayət qədər ciddi səviyyədə - 2,3 milyard dollar həcmində formalaşdırılıb. Azərbaycan portfelin həcminə görə bankın üçüncü tərəfdaş ölkəsi, adambaşına düşən investisiyanın həcminə görə isə birinci tərəfdaş ölkəsidir", - Ouen qeyd edib.
Onun sözlərinə görə, Azərbaycanın vergi sistemi getdikcə daha da səmərəli olur.
"Fəaliyyətdə olan qanunvercilik bunun üçün yaxşı şərait yaradır", - Ouen deyib.
O, Azərbaycanın vergi sisteminin inkişafında beynəlxalq ictimaiyyətin, Avropa İttifaqının və xüsusən də Niderland Krallığının rolunu vurğulayıb.
"Gələcək inkişaf, o cümlədən vergiqoyma bazasının genişləndirilməsi, vergi inzibatçılığının təkmilləşdirilməsi üçün böyük imkanlar var" , - Ouen bildirib.
Onun sözlərinə görə, qeyri-neft ÜDM-də vergi daxilolmalarının payı üzrə Azərbaycanın mövqeyi dünyada qüvvətlənir.
Azərbaycanın 1992-ci ildən Beynəlxalq Yenidənqurma və İnkişaf Bankına (BYİB) və 1995-ci ildən Beynəlxalq İnkişaf Assosiasiyasına üzv olmasından etibarən, DB ölkədə 43 layihəyə təxminən 3 milyard dollar həcmində investisiya qoyub.
Azərbaycanın 1995-ci ildə qoşulmasından sonra Beynəlxalq Maliyyə Korporasiyasının (BMK) öhdəliyi 45 layihə üzrə təxminən 350 milyon dollar təşkil edir.