Azərbaycan, Bakı, 9 fevral /Trend, müxbir A.Tağıyeva/
Türkiyənin "İş Bankası"nın idarə heyəti Azərbaycanda artıq fəaliyyət göstərən bankın alınması və ya yeni bankın yaradılması barədə qərar qəbul edib. Bu barədə cümə axşamı Trend-ə bankın baş ofisindən məlumat verilib.
"İndiki məqamda almağa hazırlaşdığımız yerli bankı hələ müəyyən etməmişik, ona görə də icazə almaq üçün Mərkəzi Banka müraciət hələ təqdim olunmayıb. Lakin bu məsələ ilə bağlı bankımız tərəfindən artıq qərar qəbul edilib", - bankdan deyiblər.
Eyni zamanda, İş Bankası filial açmaq üçün artıq Azərbaycan Mərkəzi Bankına müraciət edib.
"Biz indi Mərkəzi Bankdan cavab gözləyirik", - bankdan bildiriblər.
Türkiyə bankından deyiblər ki, "İş Bankası"nın Azərbaycanda bankın yaradılmasına qoyacağı investisiyalara gəldikdə, bu məsələ ilə bağlı qərar hələ qəbul olunmayıb.
"İş Bankası" 891 və ölkənin hüdudlarından kənarda 11 struktur yarımbölməyə malikdir, həmçinin Almaniyada törəmə banka və Çində nümayəndəliyə malikdir.
2008-ci ildə "İş Bankası Azərbaycan Mərkəzi Bankına ölkədə bank əməliyyatlarını genişləndirmək təklifi ilə müraciət edib, lakin o zaman ölkənin bank bazarına daxil olmanın forması - filial və ya fəaliyyət göstərən bankın iştirak payının alınması ilə bağlı məsələdə qeyri-müəyyənlik meydana çıxmışdı.
Bu gün Azərbaycanda 44 bank var, onlardan 22-si xarici kapitalla fəaliyyət göstərir. Onlardan yeddisinin kapitalında xarici kapital 50 faizdən 100 faizədək, 13 bankda 50 faizədək təşkil edir. Ölkədə iki xarici bankın filialı fəaliyyət göstərir.
Azərbaycanda habelə xarici bankların beş nümayəndəliyi fəaliyyət göstərir.
