Azərbaycan, Bakı, 21 aprel /Trend, müxbir A.Axundov/
2011-ci ildəki fəaliyyətin yekunları üzrə Azərbaycanın "Azərqarant Sığorta" şirkətinin aktivləri ötən ilin əvvəlinə (4,416 milyon manat) qarşı 41,06 faiz artaraq 6,23 milyon manat təşkil edib. Trend-in məlumatına görə, bu barədə şənbə günü şirkətin rəsmi mətbuatda dərc edilən balans hesabatında deyilir.
Sığorta şirkətinin maliyyə hesabatlılığının auditini "V.I.P - Audit" MMC şirkəti aparıb.
2011-ci ilin sonunda şirkətin uzunmüddətli aktivləri il ərzində 31,1 dəfə artaraq 1,234 milyon manat, qısamüddətli aktivləri isə illik 13,93 faiz artımla 4,99 milyon manat təşkil edib.
2011-ci ildə pul vəsaitlərində və onların ekvivalentlərində 3,81 milyon manat, depozit hesablarında 3,24 milyon manat, cari hesabda 0,413 milyon manat yığılıb, dövlət qiymətli kağızlarında 0,86 milyon manat, daşınmaz əmlakda isə 1,2 milyon manat təşkil edib.
2011-ci ilin yekunları üzrə "Azərqarant Sığorta" şirkətinin ödənilmiş nizamnamə kapitalı 5,21 milyon manat səviyyəsində olub. 2010-cu ilin sonunda bu rəqəm 3,26 milyon manat olub.
Şirkət 2011-ci ili 419,58 min manat həcmində xalis gəlirlə başa vurub.
Ötən ilin sonuna şirkətin məcmu kapitalı 2010-cu illə müqayisədə 40,4 faiz artaraq 5,63 milyon manat təşkil edib.
Şirkətin nizamnamə öhdəlikləri 46,34 faiz artaraq 0,6 milyon manat, ümumilikdə kapital və öhdəliklər isə 41,06 faiz artımla 6,23 milyon manat təşkil edib.
Ötən ilin yekunları üzrə şirkətin gəlirləri 1,545 milyon manat, xərcləri isə 1,126 milyon manat olub.
