Azərbaycan, Bakı, 30 aprel /Trend müxbir Ə.Həsənov/
Cari ilin mart ayında Bakının təkrar mənzil bazarında mənzilin 1 kavdratmetrinin orta hesabla qiyməti fevral ayı ilə müqayisədə 2,7 faiz artaraq 976 dollar təşkil edib. Trend-in məlumatına görə, bu barədə bazar ertəsi "Əmlak Bazarının İştirakçıları" İctimai Birliyinin hesabatında deyilir.
Martda təkrar mənzil bazarında təkliflərin həcmi fevralla müqayisədə 1,2 faiz artaraq 7600 mənzil təşkil edib.
Bazarın təkliflər portfelində Yasamal, Nəsimi, Nərimanov və Xətai rayonlarının payı 78,7 faiz təşkil edib. Uzun müddət ərzində həmin dörd rayonun hesabına təkliflər portfelinin formalaşması bu rayonlarda yeni tikililərin bazara daxil olması ilə bağlıdır.
Tədqiqat göstərir ki, ilkin bazarda təkliflər portfeli əsasən həmin dörd rayonun hesabına formalaşıb.
Bazara orta qiymətdən aşağı təklif olunan təkrar mənzillərin payı 54,2 faiz təşkil edib. Martda təkrar bazarda təklif olunan orta otaq göstəricisi 2,79, hər otağın orta qiyməti - 44 210 dollar, mənzillərin qiyməti isə 111 104 dollar təşkil edib.
