Azərbaycan, Bakı, 23 oktyabr /Trend, müxbir E.İsmayılov/
Azərbaycan Respublikası Dövlət Neft Fondu (ARDNF) yaxın vaxtlarda daha əvvəl əldə edilən fiziki qızılı ölkəyə idxal etməyə başlayacaq. Bu barədə çərşənbə axşamı Trend-ə Fonddan bildiriblər.
Nazirlər Kabinetinin daha əvvəlki qərarı ilə ARDNF-in ehtiyacları üçün ölkəyə idxal edilən qızıl ƏDV və gömrük rüsumlarından azad edilib.
Qızılın ölkədə saxlanma yeri məsələsinə gəlincə, ARDNF-dən bildiriblər ki, qızılı Azərbaycan Mərkəzi Bankında (AMB) saxlamaq planlaşdırılır.
"Əldə edilən qızılın yaxın gələcəkdə Azərbaycana idxal edilməsi planlaşdırılır və o, AMB-nin anbarlarında saxlanılacaq", - Fonddan qeyd ediblər.
Fonddan deyiblər ki, ARDNF-in yeni investisiya siyasətinə əsasən, həmçinin investisiya portfelinin şaxələndirilməsi və onun yerləşdirilməsindən ədlə edilən gəlirin artırılması məqsədilə portfelə səhmlər, qızıl və daşınmaz əmlak daxil olmaqla yeni maliyyə alətlərinin daxil edilməsi planlaşdırılır.
2012-ci il oktyabrın 1-nə olan məlumata görə, Fondun investisiya portfelində qızılın həcmi 10 ton 851 kiloqram və ya 350 146 unsiya təşkil edir.
