Azərbaycan, Bakı, 13 noyabr /Trend, müxbir A.Axundov/
Azərbaycanda yaradılan iri özəl taxılçılıq təsərrüfatlarının ərazilərində əkinə başlanılıb. Trend-in məlumatına görə, bu barədə çərşənbə axşamı iqtisadi inkişaf naziri Şahin Mustafayev Milli Məclisdə 2013-cü il və növbəti 3 il üçün dövlət büdcəsi haqqında qanun layihəsinin müzakirəsi zamanı deyib.
Onun sözlərinə görə, Ağcabədi və Beyləqan rayonlarının ərazilərində 4800 hektar qış otlaq sahələrində özəl pilot taxılçılıq təsərrüfatlarının yaradılması nəzərdə tutulub.
"Bununla əlaqədar, torpaqların təyinatı dəyişdirilib, dövlət investisiyaları hesabına su və enerji təminatı yaradılıb, kompleks melorativ tədbirlər görülüb, hazırda ərazidə muasir suvarma sistemləri qurulur və əkinə başlanılıb", - Mustafayev deyib.
Nazir bildirib ki, layihə çərçivəsində 30 min tonluq müasir taxıl anbarı, min başlıq müasir heyvandarlıq kompleksi, müasir bitki yağları istehsalı zavodu inşa olunacaq və muasir aqroservis yaradılacaq. Təsərrüfatda 350-400 nəfər daimi işlə təmin olunmaqla yanaşı, muasit texnologiyaların tətbiqi nəticəsində məhsuldarlığın respublika üzrə orta göstəricidən minimum 2 dəfə artıq olacağı gözlənilir.