Azərbaycan, Bakı, 6 fevral /Trend, müxbir İ.Xəlilova/
Azərbaycan Mərkəzi Bankı (AMB) yanında Maliyyə Monitorinq Xidməti cinayət yolu ilə əldə edilmiş pul vəsaitlərinin və ya digər əmlakın leqallaşdırılmasında, terrorçuluğun maliyyələşdirilməsində, transmilli mütəşəkkil cinayətkarlığı, habelə silahlı separatizmi, ekstremizmi və muzdluluğu dəstəkləməsində, narkotik vasitələrin və ya psixotrop maddələrin qanunsuz dövriyyəsində iştirakı ehtimal olunan, maliyyə əməliyyatlarının aparılması zamanı eyniləşdirmə məlumatlarının açıqlanması tələb olunmayan dövlətlərin siyahısını qısaldıb. Bu barədə çərşənbə günü Trend-ə Xidmətdən məlumat verilib.
"Həmin siyahıdan Montserrat və Uruqvay çıxarılıb", - Xidmətdən bildirilib.
Bu gün MMX-nin təsdiqlədiyi siyahıda 17 ölkənin - Ermənistan, Əfqanıstan, İran, İraq, Konqo, Koreya Xalq Demokratik Respublikası, Kot-d`İvuar, Qvatemala, Laos, Liberiya, Myanma, Nauru adası, Niuye, Somali, Sudan, Tailand və Vyetnamın adı var.
Bundan əvvəl 2010-cu il martın 2-də təsdiqlənmiş siyahıya dəyişiklik edilib. Nəticədə oradakı ölkələrin sayı 46-dan 33-dək azaldılıb. Əvvəl təsdiqlənmiş siyahıdakı bir sıra ölkələr FATF-in (çirkli pulların yuyulması ilə mübarizə üzrə maliyyə ölçüləri hazırlayan qrup) və başqa beynəlxalq təşkilatlar tərəfindən qarşıya qoyulan öhdəlikləri yerinə yetiriblər və bu istiqamətdə görülən tədbirlər onların siyahıdan çıxarılmasına kömək edib. Sonralar bu kateqoriyadan olan ölkələrin bu siyahısının ixtisarı ilə bağlı başqa qərarlar da qəbul edilib.
Bu siyahının tərtibi zamanı BMT, Avropa Şurası, ATƏT, İqtisadi Əməkdaşlıq və İnkişaf Təşkilatı (OECD), BVF, FATF, MONEYVAL və başqa beynəlxalq qurumların bəyanat və qərarları nəzərə alınır.
Qüvvədə olan qanunvericiliyə görə, monitorinqin subyektləri pul vəsaitləri ilə qanunsuz əməliyyatların, eləcə də siyahıya daxil edilən ölkələrin əmlakları ilə başqa əməliyyatların hədəfi və mahiyyətini aşkara çıxarmalı və həmin ölkələrlə əməliyyat barədə dərhal MMX-ni məlumatlandırmalıdır.