Azərbaycan, Bakı, 15 may /Trend, müxbir L.Abdullayeva/
Azərbaycanda kiçik istehlak kreditləri üzrə faiz dərəcələri keçmiş Sovet məkanının digər ölkələri ilə müqayisədə ən aşağılardan biridir. Bu barədə çərşənbə günü Trend-ə "Unibank" ASC-dən deyiblər.
"Məsələn, 24 ay müddətinə verilən 1000 manatlıq kredit (bu, kütləvi istehlak kreditləşməsində orta həcmdir) kreditin dəyərindən asılı olaraq 10 faiz fərqi ilə aylıq ödənişdə cəmi 5 manat təşkil edir. Bundan başqa, bu yaxınlarda üçüncü tərəfin köməyi ilə bankın belə kredit alan 1200 müştərisi arasında aparılan sorğuda "Unibank" kredit təklifində və ya onun verilməsi prosesində nəyi dəyişməlidir" sualına müştərilərin cəmi 1 faizi dərəcələrin azaldılmalı olduğunu qeyd ediblər", - "Unibank"dan bildiriblər.
"Unibank" nümayəndələri biznes kreditləri üzrə faiz dərəcələrinin yüksək olmasının iki əsas səbəbini göstəriblər. Birinci səbəb depozitlər üzrə yüksək faiz dərəcələri ilə bağlıdır ki, bu da öz növbəsində, depozitlər bazarında riteyl müştərilərini fəal kreditləşdirən banklar arasında yüksək rəqabətin olması ilə əlaqədardır.
"Azərbaycan vətəndaşları olduqca tədbirlidirlər və kiçik biznesə, daşınmaz əmlaka və s. investisiyalar yatırmaq yolu ilə əmanətlərinin olduqca yüksək gəlirliliyini təmin edə bilərlər. Son il yarım - 2 il ərzində daşınmaz əmlak və torpağın qiymətlərinin daim artmasını nəzərə alsaq, bu obyektlərə yatırılan investisiyalar sonradan illik ikirəqəmli investisiya həcminin qayıtmasını təmin edir. Bununla da banklar rəqabət qabiliyyətli olmaq üçün depozitlərə görə cəlbedici faiz dərəcələri verməyə məcburdurlar", - "Unibank"dan bildiriblər.
Bankda hesab edirlər ki, müvafiq olaraq, ölkədə biznesin uğurlu artımı üçün zəruri olan cəlb edilmiş vəsaitlərin dəyərinin azaldılması üçün banklar vəsaitlərin cəlb edilməsinin daha uzunmüddətli və ucuz mənbələrini tapmalı, həmçinin biznes istiqrazlar bazarına və yerli fond birjasına sərbəst şəkildə çıxmalıdırlar.
"İnvestorların risk iştahasını nəzərə almaqla məhsulun düzgün qurulması və düzgün gəlirlilik halında yerli şirkətlər üçün vəsaitlərin cəlb edilməsinin dəyərini ciddi şəkildə azaltmaq olar", bankdan qeyd ediblər.
Biznes kreditləri üzrə yüksək faiz dərəcələrinin ikinci səbəbi biznes kreditləri ilə bağlı sistemli risklərdir. Bankdan izah ediblər ki, bu, xüsusilə, şirkətin qeydə alınmayan gəlir və xərclərinin payının hələ də yüksək olması (yaxşılaşmaya doğru tendensiyanın müşahidə edilməsinə baxmayaraq), habelə girovun alınması və reallaşdırılması ilə bağlı obyektiv və subyektiv çətinliklərdir.
Hazırda ölkədə istehlak kreditlərinə tələbat olduqca yüksəkdir, çünki əhalinin Azərbaycanın sabit iqtisadi və siyasi gələcəyinə tamamilə haqlı inamı var.
"Unibank", öz növbəsində, yuxarıda sadalanan səbəblər müsbət iqtiqamətə doğru dəyişəcəyi təqdirdə, faiz dərəcələrini azalda bilər.
