Azərbaycan, Bakı, 8 yanvar /Trend, müxbir S.Ağayeva/
Növbəti (sayca dördüncü) iqtisadi əməkdaşlıq üzrə Azərbaycan-Macarıstan hökumətlərarası komissiyasının iclası yanvarın 27-28-də Bakıda keçiriləcək. Bunu çərşənbə günü Trend-ə Macarıstanın Azərbaycandakı səfiri Jolt Çutora deyib.
Səfirin sözlərinə görə, iclas zamanı daha çox qarşılıqlı maraq doğuran əməkdaşlıq sahələrində konkret layihə və təkliflər müzakirə olunacaq: "Bakıda iclasda iştirak etmək üçün Macarıstanın dövlət katibi, birgə hölkumətlərarası komissiyanın həmsədri Peter Siyartonun başçılıq etdiyi nümayəndə heyəti gələcək".
İclas çərçivəsində ikitərəfli iqtisadi əlaqələrin cari vəziyyəti, iqtisadi əməkdaşlığın genişləndirilməsi perspektivləri müzakirə olunacaq, eləcə də Macarıstan iqtisadiyyatına investisiya yatırılması imkanları təqdim ediləcək.
Bakıda keçiriləcək iclas zamanı, həmçinin iki ölkənin iş adamlarının iştirakı ilə biznes forumu baş tutacaq.
Azərbaycan tərəfindən komissiyanın həmsədri iqtisadiyyat və sənaye naziri Şahin Mustafayevdir.
Macarıstanın dövlət katibinin rəhbərlik etdiyi nümayəndə heyəti Azərbaycana səfəri çərçivəsində bir sıra görüşlər keçirməyi planlaşdırır.
