Azərbaycan, Bakı, 31 iyul /Trend, müxbir Zülfiyyə Qurbanova/
Azərbaycan Beynəlxalq Bankı (ABB) islam ödəniş kartları xəttini genişləndirir. Bu barədə Trend-ə ABB-nin İslam Bankçılığı Departamentinin direktoru Bəhnam Qurbanzadə bildirib.
Departament direktorunun sözlərinə görə, bank bu günlərdə "Murabaha" yeni islam plastik kartını buraxmağa hazırlaşır: "Bu, ticarət endirim kartıdır. Kartın sahibi ABB-də xidmət göstərilən pərakəndə mağazalar şəbəkəsində alış-veriş edə bilər. Kart sahibinə endirimlər və faizsiz kredit xətti əldə etmək fürsəti verilir".
O əlavə edib ki, bu, bankın "Qiblə" və "Jasmin" kartlarından sonra islam plastik kartları xəttində üçüncü məhsuldur.
2014-cü il iyulun 1-nə olan məlumata görə, ABB-nin aktiv plastik kartlarının sayı 2 035 532, bankomatlarının 709, POS-terminallarının sayı isə 7399 ədəddir.
