Azərbaycan, Bakı, 29 avqust /Trend, müxbir Zülfiyyə Qurbanova/
"Azər-Türk Bank" ASC-nin kapitalında 50 faizlik iştirak payına mülkiyyət hüququ Maliyyə Nazirliyi tərəfindən Əmlak Məsələləri Dövlət Komitəsinə verilib. Bu barədə Trend-ə Komitədən bildiriblər.
Agentliyin müsahibinin sözlərinə görə, bu, standart prosedurdur.
Komitədən deyiblər: "Bu, bankın özəlləşdirilməyə çıxarılacağı demək deyil. Dövlətin payının olduğu bir çox müəssisələrdə dövlət mülkiyyətinin idarə edilməsi məhz Dövlət Komitəsinə verilir".
Qeyd edək ki, bu ilin ötən ayında Azərbaycan Maliyyə Nazirliyi "Azər-Türk Bank" ASC-nin səhmlərinin 50 faizini alıb: səhmlərin 46 faizi "Agrarcredit" bank olmayan kredit təşkilatında, dörd faizi isə "TuranBank" ASC-dədir.
Səhmlərin qalan 46 faizi Türkiyənin "T.C.Ziraat Bankası"na, 4 faizi isə "Ziraat Bank Intenational AG"-yə (Almaniya) məxsusdur.
Bir müddət əvvəl bankdan Trend-ə verilən məlumata görə, bankın gələcək planlarına hazırda 12,24 milyon manat olan nizamnamə kapitalını artırmaq daxildir.
Bankın səhmdarlarının yeni tərkibdə ilk ümumi yığıncağı növbəti həftənin əvvəlində keçiriləcək.
"Azər-Türk Bank" ASC-nin əvvəlki səhmdarı bankdakı payının satışı üzrə sövdələşməni şərh etməkdən imtina edərək bütün detalların yalnız səhmdarların toplantısından sonra açıqlanacağını bildirib.
Bank bazarındakı mənbələrdən Trend-ə məlum olub ki, "Azər-Türk Bank" ASC-nin strukturunda dəyişiklik ediləcəyi gözlənilir. Bankın fəaliyyətində yeniliklərin tətbiq ediləcəyi istisna olunmur.
2014-cü il iyulun 1-nə bankın məcmu kapitalı 16,84 milyon manat, aktivləri 97,93 milyon manat, kredit portfeli isə 60,75 milyon təşkil edib.
"Azər-Türk Bank" 1995-ci il mayın 25-də təsis edilib.