Aqrolizinq ASC kənd təsərrüfatı texnikasının alınması üzrə ilk sazişi imzalayıb.Kənd təsərrüfatı nazirliyində Trend agentliyinə bildirilib ki, imzalanma nazirlikdə ASC-nin elan etdiyi ilk tenderin qalibləri arasında keçirilib.
Kənd təsərrüfatı nazirliyində qeyd edilib ki, taxılbiçən kombaynların alınması üzrə (210 vahid) Çinin Xinjane şirkəti ilə, təkərli traktorların alınması üzrə (350 vahid) Türkiyənin Yamakoğlu Inshaat şirkəti, traktora qoşulan kənd təsərrüfatı maşınlarının alınması üzrə (584 vahid) Koylu Tarimmakina Sanaye ve Ticaret Ltd, minitexnika (traktor və ona qoşulan kənd təsərrüfatı texnikası) (20 komplekt) alınması üzrə yerli Kometa I ltd. ilə saziş imzalanıb.
Nazirlikdə texnikanın Azərbaycana gətirilməsi məsələsinə toxunaraq bildirilib ki, ola bilsin ki, müvafiq müqavilələr imzalandıqdan sonra bir ay ərzində texnikanın bir hissəsi ASC-yə verilsin. "Ümumilikdə bütün kənd təsərrüfatı texnikasının ölkəyə gətirilməsi tenderdə nəzərdə tutulmuş şərtlərə əsasən 90 gün ərzində həyata keçirilməlidir" -deyə nazirlikdə qeyd edilib.
Qeyd edək ki, tenderin işində Türkiyədən, Çindən, Ukraynadan, İtaliyadan, Almaniyadan və Rusiyadan 28 şirkət iştirak edib.İyulun 28-də Aqrolizinq ASC üçün kənd təsərrüfatı texnikasının ikinci hissəsinin alınması üzrə tender prosedurası keçiriləcək.
