Yaxın vaxtlarda Dövlət İnvestisiya şirkətinin yaradılması haqqında prezident fərmanının təsdiqlənməsi gözlənilir. Trend in maliyyə naziri Əvəz Ələkbərova istinadən xəbər verdiyi kimi, bütün sənədlər artıq hazırlanıb. Şirkətin $100 mln həcmində nizamnamə kapitalı Dövlət Neft Fondunun vəsaiti hesabına formalaşacaq.
İnvestisiya şirkətinin yaradılmasında məqsəd təkcə inkişaf üçün vəsaitin ayrılmasından yox, həm də xarici sərmayədarlardan 4-5 dəfə daha çox vəsait cəlb etməkdən ibarətdir. Buna görə də bu şirkətin $400-500 mln sərmayə cəlb edə biləcəyini ehtimal etmək olar.
Prezidentin fərmanında şirkətin fəaliyyətinin istiqamətləri müəyyənləşdiriləcək. Belə şirkət MDB ölkələrindən Qazaxıstanda fəaliyyət göstərir.