BMT-nin Ərzaq və Kənd təsərrüfatı təşkilatının (FAO- Food and Agriculture Organization of the United Nations) mütəxəssisləri Azərbaycanın bir sıra regionlarına, o cümlədən Quba-Xaçmaz, Qobustan və Şamaxıya səfər edib. Bu barədə Trend ə Kənd təsərrüfatı nazirliyindən məlumat verilib. Səfər zamanı birgə layihələrin həyata keçirilməsinin zəruri olduğu aqrar sektorun bir sıra sahələrinin vəziyyətinə dair hesabatlar hazırlanıb. Regionlara səfər Cənub əməkdaşlığı proqramı üzrə milli ərzaq təhlükəsizliyi proqramı ilə bağlı hazırlıq işləri çərçivəsində həyata keçirilib. Layihənin hazırlanmasına azərbaycanlı mütəxəssislər də cəlb olunub.
Nazirlikdən bildirilib ki, işlər hazırlıq mərhələsindədir və Kənd təsərrüfatı nazirliyi, TİKA və FAO arasında memorandum imzalandıqdan sonra həyata keçiriləcək. Azərbaycanda layihələrin həyata keçirilməsi üçün prioritet sahələr yem istehsalı və emal müəssisələrinin, irriqasiya sistemlərinin və s. yaradılmasıdır.
Təşkilat Azərbaycanda perspektivli layihələrin gerçəkləşməsində donor təşkilatların cəlb olunması üzrə işlərin həyata keçirilməsində ölkəyə yardım etmək niyyətindədir.
