Beynəlxalq Maliyyə Korporasiyası Azərbaycanda dövlət lizinq fondunun yaradılması ideyasını dəstəkləyir. Bu barədə Trend ə BMK-nın Azərbaycanda lizinqin inkişafına texniki yardım layihəsinin rəhbəri Elçin Əhmədov məlumat verib. Hökumətdə bu təşəbbüslə Azərbaycanda Lizinq şirkətləri Assosiasiyası çıxış edib.
"Respublikada artıq Sahibkarlığa dəstək üzrə Milli Fond, Azərbaycan İpoteka Fondu fəaliyyət göstərir. Buna görə də Lizinq şirkətlərinə dəstək üzrə Fondunun yaradılması da məqsədəuyğun olardı", - deyə E.Əhmədov bildirib.
Bu gün lizinq bazarında vəsait çatışmazlığı hiss olunduğu üçün bu Fondun yaradılması sektorun və lizinq şirkətlərinin inkişafı üçün böyük yardım olardı. Hazırda onlar öz maliyyə tələbatlarını onları yaradan bankların hesabına ödəyirlər. Qismən bu prosesdə BMK, digər beynəlxalq maliyyə institutları iştirak edir. Əgər burada dövlət də iştirak edərsə, onda bu bazarın inkişafına müsbət təsir edə bilər.
"Lizinq fondu lizinq şirkətlərinin maliyyə ehtiyatlarını da dəstəkləyə bilər. Fondun maliyyə mənbələrinə büdcə vəsaitləri xidmət edə bilər ki, gələcəkdə o BMF vəsaitlərini də cəlb edə bilər. Bu məsələ dövlət səviyyəsində həll olunur", - deyə BMK-nın layihəsinin rəhbəri bildirib.