Aprelin 4-də Böyük Britaniyanın Milli Audit Ofisinin (NAO National Audit Office)baş auditoru ser Con Born Bakıya gəlir. Azərbaycanın Hesablama Palatasından Trend ə verilən məlumata görə, səfər oktyabrın sonlarında baş tutmalı olsa da , Britaniya tərəfinin iş qrafikinin gərginliyi ilə əlaqədar onun vaxtı dəyişdirilib.
HP-dan bildirilib ki, britaniyalı mütəxəssisin görüşləri aprelin 5-dən başlayacaq. O, ilk növbədə Azərbaycanın Hesablama Palatasının sədri Namiq Nəsrullayevlə görüşəcək.
C.Bornun aprelin 6-da neft gəlirlərinin şəffaflığına həsr olunmuş konfransda iştirak edəcəyi gözlənilir. Elə həmin gün HP-da strukturun əməkdaşları ilə görüşü nəzərdə tutulub ki, həmin görüşdə 2003-cü ilin mayında Londonda imzalanan qarşılıqlı anlaşma barədə memorandumun əsasında auditor müəssisələri arasında əməkdaşlığın istiqamətləri müzakirə ediləcək.
C. Bornun səfəri gedişində ali məktəblərdən birində ( Azərbaycan Dövlət İqtisad Universitetində və ya "Xəzər" Universitetində) tələbələrlə görüş planlaşdırılıb. Eləcə də, Milli Məclisin spikeri Oqtay Əsədov və parlamentin iqtisadi siyasət daimi komissiyasının üzvləri ilə görüşü nəzərdə tutulub.
HP-dan bildirilib ki, Britaniyanın baş auditoru işçi səfər çərçivəsində Azərbaycanda çalışan britaniyalı biznesmenlərlə də görüşəcək, aprelin 6-da, günün 2-ci yarısı o, Səngəçal neft terminalına baş çəkəcək.
