Azərbaycan hökuməti ölkə iqtisadiyyatına investisiya qoyuluşları siyasətini dəyişdirib və 2007-ci ildə kapital qoyuluşlarının artacağını bildirir.
Hökumət mənbələrindən Trend ə verilən məlumata əsasən, 2006-cı ildə investisiya qoyuluşlarının həcmi 5,9 mlrd. manat həcmində proqnozlaşdırılır. Sonrakı illərdə xarici investisiyaların azalması planlaşdırılırdı, lakin son məlumatlara əsasən əks proses müşahidə olunur. Əgər 2006-cı ildə xarici investisiyaların həcmi 3,5 mlrd. manat həcmində gözlənilirdisə, 2007-ci ildə ilkin olaraq ümumi kapital qoyuluşları 5,5 mlrd manat, xarici investisiyalar isə 2,6 mlrd. manat səviyyəsində proqnozlaşdırılırdı. Lakin makroiqtisadi göstəricilərin son variantanda ümumi investisiyalar 49,2% artımla 8,8 mlrd. manat, xarici investisiyalar isə 4,6 mlrd. manat həcmində göstərilib.
İlkin proqnozlar neft-qaz sahəsinə investisiya qoyuluşlarının azalması əsasında verilib. Ən böyük layihə olan BTC neft boru kəməri artıq istismara verilib, "Şahdəniz" qaz kondensat yatağının işlənilməsi isə sentyabrda təhvil veriləcək. Lakin ölkədəki iqtisadi proseslərin fəallaşması, qeyri-neft sektorunda yeni müəssisələrin yaradılması haqqında planlar ilə bağlı İqtisadi İnkişaf Nazirliyi investisiyalarla bağlı proqnozlara da təkrar baxmağı qərarlaşdırıb. Bununla yanaşı, daxili mənbələr hesabına da investisiyaların artırılması gözlənilir.