Avropa Yenidənqurma və İnkişaf Bankı Azərbaycanda 2006-cı ilin yekunları üzrə inflyasiyanın 13% təşkil edəcəyi ilə bağlı proqnozunda israr edir. Bu barədə Trend ə bankın Bakıdakı nümayəndəsi Reymond Konvey məlumat verib. Onun sözlərinə görə, ölkədə mikroiqtisadi sabitlik hələ də həll olunmamış problem olaraq qalır. Belə ki, ÜDM-in hazırkı artım templərində büdcə xərcləri sürətlə artır.
"2006-cı ildə büdcə xərcləri 150% artıb, 2007-ci ildə daha 50% artım gözlənilir ki, bu da inflyasiyanın artmasına təsir edir. Və bütün bunlar holland sindromu üçün zəmindir", - deyə R.Konvey qeyd edib. Rəsmi məlumatlara görə, inflyasiyanın 12 aylıq səviyyəsi artıq 10,2% təşkil edir.
"Beynəlxalq Valyuta Fondu təsdiq edir ki, dövlət xərcləri 6 aylıq yubanma ilə inflyasiya göstəricilərinə təsir edir. Buna görə də 2006-cı il büdcəsinin nəticələri 2007-ci ilin ortalarında görünəcək", - deyə bankın Azərbaycandakı nümayəndəsi bildirib.
"Avropa bankı büdcə xərclərinin azaldılmasına dair ölkə hökumətinə tövsiyələr verməyib. Çünki biz böyük xərclərin zəruriliyini anlayırıq. Biz bu vəsaitlərin hara xərclənəcəyini lap əvvəldən bilmək üçün hökumətə prioritetləri müəyyən etməyi təklif etmişik", - deyə R.Konvey qeyd edib.
