Azərbaycan, Bakı/ Trend müxbir İ.Xəlilova/ Avropa Yenidənqurma və İnkişaf Bankının (AYİB) proqnozuna görə, 2007-ci ildə Azərbaycanda istehlak qiymətləri 2006-cı ildəki 8,5 faizə qarşı 16 faiz artacaq. Bu barədə AYİB-in keçid iqtisadiyyatına malik olan ölkələr haqqında yenilənmiş hesabatında gösitərilib.
2007-ci ilin sonunda inflyasiya ötən ilki 11 faizə qarşı 14 faiz səviyyəsində proqnozlaşdırılır. Avropa bankı ekspertlərinin fikrincə, neft ixracının və əmək haqlarının əhəmiyyətli dərəcədə artımı pul kütləsinə təzyiq göstərir. Nəticədə inflyasiya 2006-cı ilin sonunda 2005-ci ilin sonundakı 5,4 faizdən 11,4 faizə qədər artıb. Azərbaycan milli bankının yenidənmaliyyələşdirmə faizlərinin 2006-cı ilin iyulunda 9 faizdən 9,5 faizə, yenidən 2007-ci ilin aprelində isə 12 faizə qədər artırmasına baxmayaraq bu baş verdi.
Ötən il AYİB-in Bakı nümayəndəliyinin keçmiş rəhbəri Reymond Konvey bildirmişdi ki, Azərbaycanda mikroiqtisadi stabillik hələ də həll olunmamış qalır, belə ki, ÜDM-in hazırkı artımı ilə yanaşı büdcə xərcləri də sürətli templə artır. "2006-cı ildə büdcə xərcləri 150 faiz, 2007-ci ildə isə daha 50 faiz artıb ki, bu da inflyasiyanın artmasına təzyiq göstərir",-deyə Konvey bildirib.
Beynəlxalq Valyuta Fondu bildirir ki, dövlət xərcləri altıaylıq gecikmə ilə inflyasiya göstəricilərinə təsir edir. "Bununla əlaqədar 2006-cı il büdcəsinin fiskal nəticələri özünü 2007-ci ilin ortalarında nümayiş etdirəcək",-deyə Azərbaycandakı AYİB nümayəndəsi bildirib.
Buna görə də Avropa Bankı Azərbaycan hökumətinə dövlət xərclərinin həyata keçirilməsi üçün prioriteləri müəyyənləşdirməyi təklif edib.
Bununla yanaşı, 2007-ci ilin büdcə düzəlişləri ilə xərclərin yenidən artımı gözlənilir. Amma paralel olaraq dövlət hər şeyi edir ki, ilin yekunlarına görə inflyasiya birrəqəmli həddə qalsın.
