Azərbaycanın Ekologiya Nazirliyi Xəzər dənizində suyun səviyyəsinin artacağını proqnozlaşdırır
Azərbaycan, Bakı/ Trend müxbir E.Hüseynli/ Xəzər dənizinin səviyyəsi bu ilin sonu üçün ötən illə müqayisədə 1-3 sm. artacaq. Bu barədə bazar ertəsi Ekologiya və Təbii Sərvətlər Nazirliyinin (ETSN) mətbuat xidmətindən məlumat verilib.
Regional iqlimin dəyişməsinə əsaslanan proqnozlara görə, 2015-2020-ci illərə qədər Xəzər dənizi səviyyəsinin 70-80 sm-ə qədər artması ehtimal edilir.
Xəzərin səviyyəsi üzərində müşahidələr ümumilikdə 15, Azərbaycan sektorunda isə 7 məntəqədə aparılır.
Xəzər dənizinin səviyyəsi 1996-2000-ci illərdə 35 sm enib və 2001-ci ildən yenidən qalxmağa başlayıb. Dənizin səviyyəsi 2001-2005-ci illərdə 30 sm-ə qədər yüksəlib, 2006-cı ildə isə əvvəlki illərlə müqayisədə 3-5 sm enmə müşahidə edilib.
