Azərbaycan, Bakı, 24 oktyabr/ Trend , müxbir E.İsmayılov/ "Çernomortexflot" ASC ay ərzində Azərbaycanın Gürcüstanın Kulevi Qara dəniz limanındakı neft terminalının (SOCAR şirkətinə - Azərbaycanın Dövlət Neft Şirkətinə məxsusdur) yaxınlığında batmış dibdərinləşdirici "Skadovsk" gəmisini dənizin dibindən çıxaracaq, - terminalda işlərə yaxın mənbə cümə günü bildirib.
"Çernomortexflot" şirkətinə məxsus "Skadovsk" gəmisi iritonnajlı gəmilərin limana daxil olmasına şərait yaratmaq məqsədilə, dənizin dibinin dərinləşdirilməsi üzrə iş aparırdı. Qəza terminalın işinə heç bir şəkildə təsir göstərməyib. Gəmilərin limana daxil olmasına maneə yoxdur.
"Çərşənbə axşamı "Çernomortexflot" gəminin qaldırılmasını həyata keçirəcək Ukrayna şirkəti ilə saziş imzalamalıdır", - mənbə bildirib. Şirkətin adı açıqlanmır.
Gəmi dənizin dibindən Ukraynadan gətirilmiş avadanlığın köməyi ilə bütöv çıxarılacaq. Əvvəllər "Skadovsk"un əvvəlcə kəsilməsi, sonra hissə-hissə dənizin dibindən çıxarılması planlaşdırılırdı.
Gəmidən yanacağın axmasından və ekoloji faciədən qaçmaq məqsədilə, "Skadovsk"un göyərtəsində olan dizel yanacağı və sürtkü yağının çəkilməsi artıq başa çatıb, - mənbə bildirib.
Ümumilikdə gəmidə 25-30 ton dizel və beş ton yağ olub. Yanacağın gəmidən çəkilməsi üçün işləri ukraynalı, gürcüstanlı və azərbaycanlı mütəxəssislər həyata keçiriblər. İşlər Azərbaycanın terminalının təqdim etdiyi nasosun köməyi ilə görülüb.
"Skadovsk"un yanacaq bakında zədələr olmasa da, gəminin detallarından kiçik həcmdə yağ dənizə axıb. Onun həcmi cüzi olub və gəminin ətrafında qurulmuş bonların vasitəsilə gəmidən axan yağı yığılıb.
"Skadovsk" fırtına nəticəsində (6-7 ballıq fırtına) sentyabrın 30-da saya oturub və deşilib. Sonra Ukraynadan mütəxəssislər gəlib və "Skadovsk"u saydan yedək vasitəsilə çıxarmağı qərara alıblar. Oktyabrın 3-də yedəkləmə işləri zamanı gəmi çevrilib, mənbə əvvəllər bildirib.
Gəmi qəzası nəticəsində gəmi kapitanı və iki ekipaj üzvü həlak olub. Cəsədlərin axtarışı bir neçə gün davam edib. Gəminin göyərtəsində olan 31 nəfərdən 28 - i xilas edilib.
Müəlliflə əlaqə saxlamaq üçün elektron ünvan: [email protected]
