Azərbaycan, Bakı, 21 yanvar/ Trend , müxbir E.İsmayılov/
Ağdaşda (Azərbaycanın qərb regionu) qaz - kompressor stansiyasının təmirindən sonra Gürcüstana sutkalıq qaz ixracı yeddi milyon kubmetrədək artırıla bilər, - işlərə yaxın mənbə çərşənbə günü bildirib.
İndi bu boru kəməri ilə sutkada təxminən 5 mln. kubmetr qaz nəql edilir. Boru kəməri ilə qazın nəqlinin artırılması məqsədilə, nəqletmənin maksimal təzyiqini hazırki 10 atmosferə qarşı 20 atmosferədək artırmaq planlaşdırılır.
Gürcüstan tərəfi qarşıdakı 5 il müddətində Rusiya qazının tranziti, Azərbaycan qazının Cənubi Qafqaz boru kəməri ilə tranziti və Azərbaycanın "Şahdəniz" yatağından hasil edilən kommersiya qazına görə Gürcüstana çatacaq qaz həcmlərini təsbit edilmiş qiymətlərlə SOCAR - ın törəmə şirkətinə satacaq.
"Ağdaş stansiyasının müasirləşdirilməsi üzrə işlər başa çatıb və zərurət yarandıqda [Gürcüstana qaz ixracının artırılması çərçivəsində] stansiya işə salına bilər. Boru kəməri ilə bu istiqamətdə qaz nəqlinin həcmini sutkada yeddi milyon kubmetrədək artırmaq mümkün olacaq", - mənbə deyib.
Gürcüstana gedən qaz kəmərinin təmiri üzrə də iş aparılır. "Bu istiqamətdə qaz kəmərinin etibarlılığının möhkəmləndirilməsi üzrə işlər, demək olar ki, başa çatıb", - mənbə qeyd edib.
Noyabrda Azərbaycan və Gürcüstan arasında saziş imzalanıb. Saziş, 2009 - cu ildən başlayaraq, beş il ərzində SOCAR - ın Gürcüstan bazarında aktiv fəaliyyətinə imkan yaradacaq. Memoranduma əsasən, SOCAR layihənin realizəsi üçün öz törəmə şirkətini yaradacaq və həmin şirkət vasitəsilə Gürcüstan hökumətinin müəyyən etdiyi qaz istehlakçılarının qrupunu (sosial qrupları) təmin edəcək.
Müəlliflə əlaqə saxlamaq üçün elektron ünvan: [email protected]
