TÜrkmənistan, Aşxabad, 26 mart / Trend , müxbir H.Həsənov /
Türkmənistanda fəaliyyət göstərən Birləşmiş Ərəb Əmirliklərinin (BƏƏ) Dragon Oil şirkətinin departamentlərinin birində rüşvətxorluq və proteksionizmlə bağlı ciddi pozuntular aşkarlanıb.
Şirkətin press-relizində qeyd olunur ki, daxili audit qrupu pozuntuları aşkarladıqdan sonra "şirkətin bəzi yüksək vəzifəli rəhbərlərinin ləyaqətsiz davranışları ilə bağlı" xüsusi istintaq nəticəsində bir sıra yüksək vəzifəli şəxslər tutduqları vəzifələrdən uzaqlaşdırılıblar. Təqsirləndirilənlər marketinq və müqavilə şöbəsində işləyərək tədarük işlərində cavabdehlik daşıdıqları halda "sözləşmə əsasında" fəaliyyət göstəriblər.
Dragon Oil qeyd edir ki, bu kimi pozuntular şirkətin maddi durumuna və fəaliyyətinə önəmli təsir etməyəcək.
Dragon Oil şirkəti Xəzərin Türkmənistan hissəsində 10 ilə yaxındır fəaliyyət göstərir. Şirkət 2008-ci ildə əldə etdiyi xammalı Azərbaycan və İran üzərindən ixrac edib. Şirkətin nəzarət paketi BƏƏ-nin Emirates National Oil Co şirkətinə məxsusdur. Ötən il şirkət 7,5 mln. barel neft satıb.
İlkin məlumatlara əsasən, Dragon Oil 2008-ci ildə Xəzərin Türkmənistan hissəsində neft hasilatını 28 faiz artırıb. Hazırda orta günlük hasilat 2007-ci ilin 31 997 barel neftinə nisbətdə 40 992 barel təşkil edir.
Məqalə müəllifi ilə əlaqə ünvanı: [email protected]
