Azərbaycan, Bakı, 07 oktyabr / Trend , müxbir A.Bədəlova/
Macarıstanın "Nabukko" layihəsi üzrə xüsusi nümayəndəsi Mixay Bayer belə hesab edir ki, Qətər qazının qaz kəmərlərilə Avropaya çatdırılması çox maraqlı və təzə ideyadır. Onun sözlərinə görə, Türkiyə ilə Qətər arasında müzakirəsi bu yaxınlarda başlayan qaz boru xəttinin tikintisi uzun çəkəcək.
Bayerin sözlərinə görə, Qətər qazının nəqli çox çətin marşrutla həyata keçiriləcək.
"Əgər bu xətt İraq ərazisindən keçəcəksə, onda belə bir sual meydana çıxır ki, bu ölkə daşınmanın stabilliyinə və təhlükəsizliyinə nə dərəcədə zəmanət verə bilər. Əgər İraqdan keçməsə, onda marşrut Səudyyə Ərəbistanı və ya İordaniya, yaxud Suriya ərazisindən keçə bilər. Bu da bir neçə ölkə ərazisindən keçəcək bir boru kəməri olacaq ki, onun da tikintisi üçün uzun zaman lazımdır", - Bayer çərşənbə axşamı Bakıda Azərbaycan Prezidenti yanında Strateji Araşdırmalar Mərkəzində çıxışı zamanı deyib.
Qətərlə Türkiyə arasında qaz kəmərinin tikintisi bu gün danışıqlar mərhələsindədir. Hər iki ölkənin Energetika Nazirliyi tərəfindən qaz xətti layihələrinin həyata keçirilməsi üçün hazırlıqlarla məşğul olan işçi qrup yaradılıb. Qətərlə Türkiyə arasında qaz kəmərinin Səudyyə Ərəbistanı və ya İordaniya, yaxud Suriya ərazisindən keçməsi gözlənilir.
O deyib ki, bu, Avropa üçün sadəcə ideyadır, Türkiyə üçün isə vacib ideyadır və çox güman ki, Qətər qazı "Nabukko" layihəsi üçün əsas mənbə olmayacaq. "Biz ümid edirik ki, bizə Qətər qazı lazım olmayacaq və biz boru kəmərini başqa mənbələrdən alınan qazla doldura biləcəyik", - Bayer belə deyib.
Qətər qaz ehtiyatlarının həcminə görə dünyada üçüncü yeri tutur, həmçinin əsas mayeləşdirilmiş qaz ixracatçısıdır. BP-dən verilən məlumatlara əsasən, ölkədə 2009-cu ilin əvvəlinə qaz ehtiyatı 25.46 trilyon kubmetr təşkil edib ki, bu da dünya qaz ehtiyatının 13.8 faizini təşkil edir. 2008-ci ildə Qətərdə 76.6 milyard kubmetr qaz hasil edilib ki, bu da 2007-ci ildəki hasilatdan 20.9 faiz artıqdır.
Dəyəri 7,9 mlrd. avro olan "Nabukko" kəməri ilə Xəzər regionu və Yaxın Şərqdən Aİ ölkələrinə qazın ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir.
Məqalə müəllifi ilə əlaqə ünvanı: [email protected]