Türkmənistan, Aşqabad, 4 fevral / Trend , müxbir H.Həsənov/
Fransa Respublikasının Prezidenti Nikola Sarkozi Türkmənistan rəhbəri Qurbanqulu Berdiməhəmmədovdan Türkmənistana rəsmi səfər təklifi alıb.
Fevralın 1-dən 3-nə kimi Parisə ilk rəsmi səfərdə olan Berdiməhəmmədov ölkədə olduğu müddətdə səmimi qarşılanma və dəvətə görə Fransa tərəfinə razılığını bildirib.
Səfər çərçivəsində hökumətlərarası müqavilə paketi imzalanıb, Türkmənistan bazarına maraqlı olduğunu bildirən Fransız şirkətləri ilə birgə biznes-forum keçirilib. Tərəflər Türkmənistan qazının Avropaya ixracı imkanlarını öyrənir, ilk variant kimi Xəzər və Azərbaycan vasitəsi ilə Nabukko layihəsi çərçivəsində nəqlin həyata keçirilməsi nəzərdən keçirir.
Parisdə bağlanan sənədlər arasında "Türkmənistan-Fransa birgə iqtisadi əməkdaşlıq üzrə beynəlxalq komissiyasının yaradılması barədə müqavilə", "Xarici İşlər Nazirlikləri arasında əməkdaşlıq haqqında müqavilə protokolu", "Mədəniyyət, təhsil, elm və texnika sahəsində əməkdaşlıq haqqında müqavilə", "Muzey işləri sahəsində Mədəniyyət Nazirlikləri arasında əməkdaşlıq haqqında müqavilə", "Türkmənistanın ticarət və sənaye palatası və Fransa Müəssisələr hərəkatı arasında əməkdaşlıq haqqında müqavilə" vardır.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 mlrd. kubmetrə bərabərdir. Layihənin iştirakçıları Avstriyanın OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botaş və Almaniyanın RWE şirkətləridir. Kəmərin uzunluğu 3300 kilometrdir.
