Azərbaycan, Bakı, 4 avqust /Trend, müxbir E.İsmayılov/
ARDNŞ (Azərbaycan Dövlət Neft Şirkəti) Xəzərin Azərbaycan sektorundakı "Bahar-2" perspektivli strukturunda üçölçülü geofiziki tədqiqatları davam etdirmək üçün hava şəraitinin əlverişli olmasını gözləyir. Bu barədə ARDNŞ-dəki mənbə çərşənbə günü məlumat verib.
"Tədqiqatlar dayandırılıb, çünki artıq bir neçə həftədir, külək işləri həyata keçirməyə imkan vermir. Hava şəraiti imkan verən kimi, araşdırma davam etdiriləcək", - mənbə bildirib.
Onun sözlərinə görə, strukturun tədqiq olunması üzrə işlərin bu ilin sonunadək başa çatdırılması planlaşdırılır.
Strukturda 3D işlərinin bir hissəsi ötən il ARDNŞ tərəfindən yerinə yetirilib, sonralar mövsümi iqlim dəyişiklikləri ilə əlaqədar işlər dayandırılıb. Strukturda üçölçülü tədqiqatların aparılması onun geoloji strukturunun müəyyən edilməsi üçün lazımdır.
Bundan əvvəl ARDNŞ "Bahar Energy LimitedÜ şirkəti ilə Xəzər dənizinin Azərbaycan sektorunda yerləşən "Bahar" və "Qumdəniz" dəniz yataqlarına daxil olan blokların kəşfiyyatına, reabilitasiyasına, işlənməsi və hasilatına dair PSA tipli müqavilə imzalayıb. Bu günlərdə müqavilə Parlamentdə ratifikasiya olunub.
Müqavilənin ikinci hissəsi "Bahar-2" strukturunda kəşfiyyat işlərini nəzərdə tutur. Kəşfiyyat işləri çərçivəsində üç il ərzində bir kəşfiyyat quyusu qazmaq planlaşdırılır. Zərurət olarsa, dördüncü il daha bir quyu qazmaq olar. İlkin hesablamalara görə, "Bahar Energy Limited" şirkəti müqavilə çərçivəsində işlərin reallaşdırılması üçün bir milyard dollar həcmində sərmayə qoyacaq.
1969-cu ildən işlənən "Bahar" yatağı Bakının cənub-şərqindən 40 kilometr məsafədə yerləşir. İndiyədək yataqdan 16,8 milyon tondan çox neft və 128,7 milyard kubmetrə yaxın qaz hasil edilib.