...

Azərbaycan, Gürcüstan və Qazaxıstan neft yüklərinin həcmini artıracaq

Energetika Materials 1 Sentyabr 2010 19:03 (UTC +04:00)

Azərbaycan, Bakı, 1 sentyabr /Trend, müxbir E.İsmayılov/

Azərbaycan, Gürcüstan və Qazaxıstan Azərbaycan-Gürcüstan dəhlizi çərçivəsində neft yüklərinin həcminin artırılması barədə qərar qəbul ediblər. Bu barədə çərşənbə günü ARDNŞ prezidenti Rövnəq Abdullayev bildirib.

Abdullayevin sözlərinə görə, hazırda dəhlizlə ildə 10 milyon tona yaxın neft məhsulu nəql edilir. Qəbul edilən qərara əsasən, bu həcmlərin ildə 20 milyon tona çatdırılması planlaşdırılıb. Xüsusilə, bu terminallarda işlərin görülməsi, tanker donanmasının artırılması nəzərdə tutulur. Azərbaycanda dəmiryolla nəql həcminin artırılması planlaşdırılıb ki, buna da yaxın illərdə bir milyon dollaradək vəsait xərclənəcək. Yüklərin nəqlinin artırılması işinə Kulevi, Poti və Batumi terminalları cəlb ediləcək.

ARDNŞ prezidentinin sözlərinə görə, Qazaxıstan tərəfi dəhliz çərçivəsində neft yüklərinin həcmini yüksək səviyyəyə qaldırmaq niyyətindədir və onun genişləndirilməsində və əsas enerji dəhlizinə çevrilməsində maraqlıdır.

Onun sözlərinə görə, Qazaxıstanın dəhliz çərçivəsində neft nəqlinin həcminin artırılması ilə bağlı istəyi dünən Tbilisidə keçirilən görüşün əsas səbəbi olub.

Tərəflər görüşün yekunları üzrə dəhlizin gücünün artırılması ilə bağlı əsas istiqamətləri müəyyənləşdiriblər və memorandum imzalayıblar.

Qazaxıstan neftinin Azərbaycan ərazisi vasitəsilə Transxəzər sistemi ilə nəqli məsələsinə toxunan Abdullayev qeyd edib ki, hazırda texniki-iqtisadi əsaslandırmanın hazırlanması üçün şirkətlərin müəyyənləşdirilməsi üzrə işlər aparılır. Bu layihənin həyata keçirilməsi üçün ARDNŞ və "QazMunayQaz" birgə müəssisə yaradıblar.

Xəbər lenti

Xəbər lenti