Azərbaycan, Bakı, 16 sentyabr /Trend, müxbir E.İsmayılov/
"Nabukko" Konsorsiumu qazı təkcə Xəzərin Azərbaycan hissəsindəki "Şahdəniz" qaz-kondensat yatağından deyil, eləcə də ARDNŞ və xarici şirkətlərin işlədiyi meydançalardan qəbul etməyə hazırdır. Bu barədə cümə axşamı Bakıda "OMV Gas and Power" şirkətinin İcraiyyə Şurasının üzvü Verner Auli deyib.
"Nabukko" ilə bağlı məsələ həll edilərsə, istənilən qaz "alqışlanacaq", - Auli bildirib.
Onun sözlərinə görə, Azərbaycanda həm ARDNŞ-in, həm də digər şirkətlərin işlədiyi çoxlu meydança var, lakin onlar "Şahdəniz" kimi böyük deyil.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2015-ci ildə start veriləcək.
"Nabukko" qaz kəmərinin tikintisi iki əsas fazanın gedişində həyata keçiriləcək. Tikintinin birinci fazasına (2011-ci il) Türkiyə sərhədindən başlayaraq Avstriyanın Baumqarten şəhərində başa çatan 2 min kilometr uzunluğunda boru kəmərinin çəkilişi daxildir. İkinci fazaya (2014-2015-ci illər) boru kəmərinin Türkiyə və Gürcüstan, eləcə də Türkiyə ilə İraq arasında yerdə qalan hissəsinin tikintisi daxildir.
"Nabukko" qaz kəmərinin uzunluğu 2730 kilometr olan birinci hissəsinin tikintisinə Ankaranın (Türkiyə) cənub hissəsindən başlanacaq və qərb istiqamətində Mərkəzi Anadolu və Mərmərə dənizindən keçərək Bolqarıstan sərhədinədək uzanacaq. Bu marşrutun 75 faizi mövcud boru kəmərləri vasitəsilə çəkiləcək.
Layihə iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.
