Azərbaycan, Bakı, 29 sentyabr /Trend/
ARDNŞ-nin Marketinq və İqtisadi Əməliyyatlar İdarəsi yanvar-avqustda Bakı-Tbilisi-Ceyhan (BTC) boru kəməri vasitəsilə 18,57 milyon tondan çox Azərbaycan nefti ixrac edib. Keçən il ARDNŞ BTC ilə 24,6 milyon tondan artıq neft ixrac edib. Bu barədə İdarənin məlumatında deyilir.
ARDNŞ 2008-ci ildə BTC vasitəsilə 20,5 milyon tona yaxın neft ixrac edib. 2007-ci ildə bu göstərici 6,5 milyon ton, 2006-cı ildə isə 1,403 milyon ton təşkil edib (bu marşrut vasitəsilə neft ixracı 2006-cı ilin may ayında başlayıb).
BTC boru kəmərinin ümumi uzunluğu 1768 kilometrdir ki, bunun da 443 km-i Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin inşasına 2003-cü ilin aprelində, neftlə doldurulmasına isə 2005-ci ilin mayında başlanılıb.
BTC Co-nun səhmdarları aşağıdakılardır: BP (30,1 faiz); AzBTC (25 faiz); Chevron (8,90 faiz); Statoil (8,71 faiz); ТРАО (6,53 faiz); Eni (5 faiz ); Total (5 faiz); Itochu (3,40 faiz ); Inpex (2,50 faiz); ConocoPhillips (2,50 faiz) və Amerada Hess (2,36 faiz).
