Azərbaycan, Bakı, 23 avqust /Trend, müxbir E.İsmayılov/
Azərbaycanın "Azəri-Çıraq-Günəşli" dəniz neft yataqları blokunun işlənməsi layihəsinin operatoru kimi çıxış edən BP şirkəti ilin sonunadək blokdakı beş yeni quyunun qazılmasını başa çatdırmağı planlaşdırır. Bu barədə BP şirkətinin ilin birinci yarısı üzrə hesabatında deyilir.
"İlin birinci yarısında AÇG-də üç quyu qazılıb. İlin sonunadək daha beş quyunun qazılması planlaşdırılır", - hesabatda deyilir.
Hazırda "Mərkəzi Azəri", "Qərbi Azəri" və "Şərqi Azəri" yataqlarında, eləcə də "Günəşli" yatağının dərin hissəsində quyular qazılır.
"Çıraq" yatağına gəldikdə, burada platformadakı qazma qurğusunda planlı profilaktik işlər aparılır. Onların 2012-ci ilin birinci rübündə başa çatdırılması nəzərdə tutulub.
"Azəri-Çıraq-Günəşli" yataqlar blokunda hasilatın pay bölgüsü barədə saziş 1994-cü ildə imzalanıb. Layihənin iştirakçıları aşağıdakılardır: BP (operator - 35,83 faiz iştirak payı), "Chevron" (11,27 faiz), AzACG (11,6 faiz), INPEX (10,96 faiz), "Statoil" (8,56 faiz), "Exxon" (8 faiz), TPAO (6,75 faiz), "Itochu" (4,3 faiz), "Hess" (2,72 faiz).
