...

AGRI layihəsinin texniki-iqtisadi əsaslandırılmasının hazırlanma tarixi açıqlanıb

Energetika Materials 15 Aprel 2014 20:32 (UTC +04:00)

Azərbaycan, Bakı, 15 aprel /Trend, müxbir E.İsmayılov/

2014-cü ilin I yarısında maye qazın Xəzər dənizi regionundan Avropaya tədarükünü nəzərdə tutan AGRI layihəsi (Azərbaycan-Gürcüstan-Rumıniya interkonnektoru) çərçivəsində texniki-iqtisadi əsaslandırmanın (TİƏ) hazırlanmasını başa çatdırmaq planlaşdırılır.

Trend-in Rumıniya İqtisadiyyat Nazirliyinin rəsmi saytına istinadən verdiyi məlumata görə, TİƏ-nin hazırlanması tamamlandıqdan sonra tərəflər layihə üzrə müvafiq qərar qəbul edicəklər.

Məlumata əsasən, AGRI layihəsi və Azərbaycanla Rumıniya arasında ticarət-iqtisadi əməkdaşlığın genişləndirilməsi məsələləri Rumıniyanın iqtisadiyyat naziri Konstantin Nitsanın Azərbaycanın energetika naziri Natiq Əliyev və ARDNŞ prezidenti Rövnəq Abdullayevin rəhbərlik etdiyi nümayəndə heyəti ilə görüşündə müzakirə olunub.

Məlumatda deyilir: "Enerji sahəsində əməkdaşlığa gəlincə, tərəflər AGRI layihəsinin inkişafında maraqlı olduqlarını təsdiq ediblər. AGRI layihəsi hazırda hazırlanma mərhələsindədir, buna görə də TİƏ, onun reallaşdırılması üçün nəzərdə tutulan investisiyaların həcmi hələ müəyyənləşdirilməyib".

Qeyd edək ki, layihənin TİƏ-ni Böyük Britaniyanın müvafiq tenderdə qalib gələn "Penspen" şirkəti hazırlayır.

Məqalədə:
Xəbər lenti

Xəbər lenti