Azərbaycan, Bakı, 1 avqust /Trend, müxbir Emil İsmayılov/
Türkiyənin Dövlət Boru Kəməri Şirkəti BOTAŞ 2014-cü ilin I yarısında müxtəlif mənbələrdən 21,33 milyard kubmetr qaz idxal edib. 2013-cü ilin analoji dövründə bu rəqəm təqribən 19,1 milyard kubmetr təşkil edib.
Türkiyənin Azərbaycandan idxal etdiyi qaz Cənubi Qafqaz qaz kəməri (Bakı-Tbilisi-Ərzurum) ilə tədarük edilir.
Trend-in BOTAŞ-ın saytına istinadən verdiyi məlumata görə, şirkət ümumilikdə 2013-cü ildə müxtəlif mənbələrdən 38,42 milyard kubmetr qaz idxal edib. Bu rəqəm 2012-ci ildə 43,09 milyard kubmetr olub.
Bundan başqa, yanvar-iyun aylarında 312 milyon kubmetr qaz BOTAŞ-ın ixrac əməliyyatlarının payına düşüb. Ötən ilin eyni dövründə bu göstərici 295 milyon kubmetr qaz olub. 2013-cü ildə şirkətin ixrac əməliyyatlarının payı 694 milyon kubmetr qaz təşkil edib. 2012-ci ildə isə bu göstərici 622 milyon kubmetrə bərabər olub.
Hesabat dövründə Türkiyənin daxili bazarında 20,52 milyard kubmetr qaz reallaşdırılıb. 2013-cü ilin müvafiq dövründə isə bu rəqəm 19,02 milyard kubmetr təşkil edib.
Ötən ilin yekunları üzrə bu göstərici 37,96 milyard kubmetrdən çox olub. 2012-ci ildə bu rəqəm təqribən 41,44 milyard kubmetr təşkil edib.
