Azərbaycan, Bakı, 5 noyabr /Trend, müxbir Emil İsmayılov/
ARDNŞ (Azərbaycan Respublikası Dövlət Neft Şirkəti) və Fransanın "Total" şirkəti "Abşeron" yatağından hasil olunan qazın Azərbaycanda yeni neft və qaz emalı və neft-kimya məhsullarının istehsalı kompleksinin yaradılması çərçivəsində tikiləcək qaz emalı zavodunda emalının mümkünlüyü ilə bağlı danışıqlar aparır.
Trend xəbər verir ki, bu barədə çərşənbə günü jurnalistlərə ARDNŞ-nin (Azərbaycan Respublikası Dövlət Neft Şirkəti) prezidenti Rövnəq Abdullayev bildirib.
Onun sözlərinə görə, indiki məqamda əməkdaşlığın bir neçə variantı nəzərdən keçirilir. Onların arasında qazın "Total" tərəfindən bazar qiymətlərinə alınması və onun daxili bazarda istifadəsi üçün zavodda emalı, yaxud gələcəkdə ixrac olunması məqsədilə "Total" üçün zavodda təmizlənməsi imkanları da var.
Abdullayev qeyd edib: "Hazırda mümkün formaların müzakirəsi gedir".
Bir müddət əvvəl energetika naziri Natiq Əliyev Xəzərin Azərbaycan sektorundakı "Abşeron" qaz-kondensat yatağının işlənməsinə 2021-ci ildən başlanacağını bildirib.
Onun sözlərinə görə, yatağın işlənməsi layihəsinin operatoru olan Fransanın "Total" şirkəti bu yaxınlarda Azərbaycan Respublikası Dövlət Neft Şirkətinə (ARDNŞ) yatağın işlənmə proqramını təqdim edib: "Bu layihə üzə işlər çərçivəsində məqsəd ildə 5 milyard kubmetr qaz hasil etməkdir".
N.Əliyev qeyd edib ki, bu layihə həm də mürəkkəbdir, çünki yataq suyun çox dərinliyində yerləşir: "Lakin hesab edirəm ki, qazandığımız təcrübə yatağı uğurla istismara verməyimizə imkan verəcək".
"Abşeron" qaz-kondensat yatağı 2011-ci ilin sentyabrında kəşfiyyat quyusununu qazılması nəticəsində kəşf edilib.
