Bakı. Trend:
Yaponiyanın INPEX şirkəti Azərbaycanla uzunmüddətli əməkdaşlığın yeni mərhələsinin qurulmasında maraqlıdır.
Trend xəbər verir ki, bunu Yaponiyanın INPEX şirkətinin Avropa və Yaxın Şərq layihələri üzrə icraçı direktoru və baş vitse-prezidenti Munehiro Hosono Bakı Enerji Həftəsinin ikinci günündə keçirilən panel müzakirəsində deyib.
Onun sözlərinə görə, INPEX enerji keçidinin enerji təhlükəsizliyi, iqtisadi reallıqlar və bazarın faktiki vəziyyəti əsasında həyata keçirilməsinin vacibliyinə inanır. Şirkətin "INPEX Vision 2032" strategiyası da məhz bu prinsiplər üzərində qurulub.
M.Hosono qeyd edib ki, karbon emissiyalarının nisbətən aşağı olması səbəbindən təbii qaz yaxın gələcəkdə də, xüsusilə iqtisadi inkişaf üçün sabit və genişmiqyaslı enerji təchizatına ehtiyac duyulan regionlarda mühüm rol oynamaqda davam edəcək.
O bildirib ki, şirkətin strategiyası mövcud neft-qaz layihələrinin gücləndirilməsi ilə yanaşı, üç əsas inkişaf istiqamətini əhatə edir. Bunlar təbii qaz və enerji biznesinin genişləndirilməsi, karbon emissiyalarının azaldılmasına yönəlmiş texnologiyaların, o cümlədən karbonun tutulması və saxlanılması (CCS) və hidrogen layihələrinin inkişafı, eləcə də enerji və təbii ehtiyatlar sektorunda qabaqcıl texnologiyaların tətbiqidir.
M.Hosono vurğulayıb ki, INPEX hasilatdan başlayaraq mayeləşdirmə, daşınma və marketinqə qədər enerji dəyər zəncirinin bütün mərhələlərində fəaliyyət göstərən şirkət kimi geniş təcrübəyə malikdir. Avstraliyadakı Ichthys LNG və İndoneziyadakı Abadi LNG layihələri bunun bariz nümunələridir.
O qeyd edib ki, INPEX 2003-cü ildən etibarən "Azəri-Çıraq-Günəşli" (AÇG) yataqlar blokunun tərəfdaşıdır və layihədə təxminən 10 faiz paya malikdir. Şirkət üçün AÇG uzunmüddətli istehsal tarixinə malik mühüm aktiv olaraq qalır.
"Layihə daha yetkin inkişaf mərhələsinə keçdikcə, yataqların səmərəli idarə olunması və əməliyyat mükəmməlliyi daha da vacib əhəmiyyət kəsb edir. INPEX AÇG layihəsində iştirakı sayəsində inkişaf edib və indi davamlı inkişafın təmin olunmasına töhfə verməyə çalışır", - deyə o bildirib.
M.Hosono əlavə edib ki, şirkət Azərbaycanı yalnız mövcud aktivlər bazası kimi deyil, həm də böyük gələcək potensialına malik ölkə kimi qiymətləndirir.
"Qaz yataqlarının işlənməsi, dəniz layihələrinin icrası və CCS kimi praktiki aşağıkarbonlu həllər sahəsində malik olduğumuz təcrübə Azərbaycanda əlavə dəyər yarada bilər. Yeni layihələrdə iştirak, mövcud aktivlərin daha da inkişaf etdirilməsi və səmərəli texnoloji həllərin tətbiqi vasitəsilə əməkdaşlığımızı genişləndirmək üçün ciddi imkanlar görürük", - deyə o vurğulayıb.
M.Hosono bildirib ki, INPEX real və məsuliyyətli enerji keçidinə sadiqdir və Azərbaycanla uzunmüddətli əməkdaşlığın yeni mərhələsinin qurulmasında maraqlıdır.
